നടിയെ ആക്രമിച്ച കേസില്‍ ജയില്‍വാസം അനുഭവിച്ച ദിലീപിന് സോഷ്യല്‍ മീഡിയയില്‍ അടക്കം ശക്തമായ എതിര്‍പ്പുണ്ട്. പ്രേക്ഷകര്‍ക്കിടയില്‍ നിന്നുള്ള എതിര്‍പ്പ് തന്നെ മാനസികമായി തളര്‍ത്തുകയാണെന്ന് പരോക്ഷമായി പറയുകയാണ് ദിലീപ്. കഴിഞ്ഞ കുറേ കാലമായി ദിവസവും താന്‍ കരഞ്ഞു കൊണ്ടിരിക്കുകയാണെന്ന് ദിലീപ് പറഞ്ഞു. പവി കെയര്‍ ടേക്കറിന്റെ പ്രൊമോഷന്‍ പരിപാടിക്കിടെയാണ് ദിലീപിന്റെ വൈകാരിക പ്രതികരണം.
' പ്രേക്ഷകരുടെ കൈയടി, എന്നെ വിശ്വസിച്ചു സിനിമ നിര്‍മിക്കുന്ന നിര്‍മാതാക്കള്‍, അതുപോലെ എനിക്ക് പുതിയ കഥാപാത്രങ്ങള്‍ നല്‍കുന്ന സംവിധായകര്‍, എഴുത്തുകാര്‍ തുടങ്ങി ഒരുപാട് പേരുടെ പ്രാര്‍ത്ഥനയാണ് ഞാന്‍. ഈ സിനിമ എത്രത്തോളം എനിക്ക് ആവശ്യമാണെന്ന് നിങ്ങള്‍ക്ക് അറിയാം. ഇത് എന്റെ 149-ാം സിനിമയാണ്. ഇത്രയും കാലം ഞാന്‍ നിങ്ങളെ ഒരുപാട് ചിരിപ്പിച്ചു. പക്ഷേ കഴിഞ്ഞ കുറേ കാലമായി ദിവസവും കരഞ്ഞു കൊണ്ടിരിക്കുകയാണ് ഞാന്‍. ഇവിടെ നിലനില്‍ക്കാന്‍ എനിക്ക് ഈ സിനിമ ആവശ്യമാണ്,' ദിലീപ് പറഞ്ഞു.
