മലയാള ഗാനശാഖയെ ഒരു പിടി അമൂല്യഗാനങ്ങള്‍ കൊണ്ട്‌ സമ്പന്നമാക്കിയ സംഗീതകാരന്‍ ആരും സഹായിക്കാനില്ലാതെ ചെന്നൈയിലെ സര്‍ക്കാര്‍ ആശുപത്രിയില്‍ അന്തരിച്ചിട്ട്‌ മുന്ന്‌ ദശകങ്ങള്‍ പിന്നിട്ടു.
മലയാളിയുടെ പ്രിയ സംഗീതഞ്‌ജന്‍ ബാബുരാജിന്‍റെ മുപ്പതാം ചരമവാര്‍ഷികം ഒക്ടോബര്‍ ഏഴിന്‌ അധികം ആരും അറിയാതെ കടന്നു പോയി.
മലയാള സിനിമാഗാനങ്ങളിലേക്ക്‌ ഹിന്ദുസ്ഥാനി രാഗങ്ങളെ സന്നിവേശിപ്പിച്ച കോഴികോടുകാരുടെ ബാബുക്കയെ അനുസ്‌മരിക്കാന്‍ അരങ്ങേറിയത്‌ തീര്‍ത്തും ആഡംബര രഹിതമായ ചില സംഗീതകൂട്ടായ്‌മകള്‍ മാത്രം.
എം എസ്‌ ബാബുരാജ് നൂറോളം ചിത്രങ്ങള്‍ക്ക്‌ മാത്രമേ സംഗീതം നല്‌കിയിട്ടുള്ളു. എന്നാല്‍ സമകാലീനരായിരുന്ന സംഗീഞ്‌ജരേക്കാള്‍ ഹിറ്റുകള്‍ അദ്ദേഹത്തിന്‌ സൃഷ്ടിക്കാനായി. കൈവച്ച ഗാനങ്ങളെല്ലാം അനശ്വരമാക്കാനുള്ള പുണ്യം അദ്ദേഹത്തിനുണ്ടായിരുന്നു.
ബാബുരാജിന്‌ മുമ്പും പിമ്പും ആരും തന്നെ സിനിമാഗനങ്ങളെ ഇത്രമേല്‍ മധുരമായ ഗസലുകളാക്കി മാറ്റിയിട്ടില്ല. ഹൃദയത്തിലേക്ക്‌ അലിഞ്ഞ്‌ ഇറങ്ങുന്ന വേദനകളായിരുന്നു അദ്ദേഹത്തിന്‍റെ ഗാനങ്ങള്‍. പ്രണയത്തിനും വിരഹത്തിനും പുതിയ ഭാവുകത്വമാണ്‌ പി ഭാസ്‌കരന്‍-യേശുദാസ്‌-ബാബുരാജ് ടീം നല്‌കിയത്‌.
യേശുദാസും എസ്‌ ജാനകിയും ആയിരുന്നു അദ്ദേഹത്തിന്‍റെ പ്രിയപ്പെട്ട ഗായകര്‍. താമസമെന്തേ വരുവാന്‍...(ഭാര്‍ഗവീനിലയം), തളിരിട്ട കിനാക്കള്‍ തന്‍..(മൂടുപടം), അകലേ അകലേ നീലാകാശം..(മിടുമിടുക്കി), താനേ തിരിഞ്ഞും മറിഞ്ഞു (അമ്പലപ്രാവ്‌), പാതിരാവായില്ല..(മനസ്വിനി), അനുരാഗ ഗാനം പോലെ..(ഉദ്യോഗസ്ഥ), അഞ്‌ജന കണ്ണെഴുതി (തച്ചോളി ഒതേനന്‍), സുറുമ എഴുതിയ മിഴികളേ..(ഖദീജ), പ്രാണ സഖി ഞാന്‍ വെറുമൊരു..(പരീക്ഷ) എന്നിങ്ങനെ ബാബുരാജ് അനശ്വരമാക്കിയ മലയാളത്തിന്‍റെ സുവര്‍ണ്ണ ഗാനങ്ങളുടെ പട്ടിക നീണ്ടു പോകുന്നു.
PRO
PRO
മാപ്പിള പാട്ടുകളില്‍ ഒരു ‘കൊട്ട പൊന്നുണ്ടല്ലോ..’(കുട്ടിക്കുപ്പായം), ‘പാലാണു തേനാണു..’ (ഉമ്മ) എന്നീ ഗാനങ്ങള്‍ ഇന്നും വേറിട്ടു നില്‍ക്കുന്നു. ഗായകനെന്ന നിലിയലും ബാബുരാജ് ഏറെ ശ്രദ്ധിക്കപ്പെട്ടു. സുബൈദയിലെ ‘പൊട്ടിത്തകര്‍ന്ന കിനാവിന്‍റെ..’എന്ന ഗാനം തന്നെ മികച്ച ഉദാഹരണം.
മലയാളിയുടെ ചുണ്ടില്‍ ഇന്നും തങ്ങി നില്‍ക്കുന്ന ഈ ഗാനങ്ങളുടെ സൃഷ്ടാവിന്‌ ഒരിക്കല്‍ പോലും സംസ്ഥാന ചലച്ചിത്ര പുരസ്‌കാരം ലഭിച്ചിരുന്നില്ല.
ജീവിതം ഒരിക്കലും ബാബുരാജിനൊട്‌ കരുണ കാണിച്ചില്ല. ബംഗാളിയായ പിതാവിന്‌ മലയാളിയായി മാതാവില്‍ പിറന്ന ബാബുരാജിന്‌ നന്നേ ചെറുപ്പത്തില്‍ തന്നെ ഇരുവരേയും നഷ്ടപ്പെട്ടു.
കോഴിക്കോടന്‍ തെരുവുകളില്‍ പാടി നടന്നാണ്‌ ജീവിക്കാനുള്ള വക ചെറുപ്പക്കാലത്ത്‌ ബാബുരാജ് സമ്പാദിച്ചിരുന്നതെന്ന്‌ പഴമക്കാര്‍ പറയാറുണ്ട്‌. കുഞ്ഞുമുഹമ്മദ്‌ എന്ന പൊലീസുകാരന്‍ പിന്നീട്‌ ബാബുരാജിന്‍റെ ചുമതല ഏറ്റെടുക്കുകയായിരുന്നു.
സംഗീതകാരനായി പേരെടുത്ത ശേഷവും ഗാന മേളകള്‍ക്കും മറ്റും കൂലി ചോദിച്ചു വാങ്ങുന്ന ശീലം അദ്ദേഹത്തിനില്ലായിരുന്നു. പ്രതിഫലം കുറവായത്‌ കൊണ്ട്‌ ദേവരാജന്‍ മാസ്‌റ്റര്‍ ഒഴിവാക്കിയ അവസരങ്ങളിലൂടെയായിരുന്നു ബാബുരാജ് തുടക്കത്തില്‍ സിനിമയില്‍ എത്തിയത്‌.
സ്വന്തം പ്രതിഭയെ സമ്പത്താക്കി മാറ്റാനുള്ള കഴിവ്‌ അദ്ദേഹത്തിനില്ലായിരുന്നു. ലോകം അറിയുന്ന ഗായകനും സംഗീതസംവിധായകനും ആയിരുന്നപ്പോഴും സ്വന്തമായി ഒരു ബാങ്ക്‌ അക്കൗണ്ട്‌ പോലും ബാബുരാജിന്‌ ഉണ്ടായിരുന്നില്ല.
മലയാളത്തിന്‌ അമൂല്യ ഗാനങ്ങള്‍ സമ്മാനിച്ച കലാകാരന്‍ 1978 ഒക്ടോബര്‍ ഏഴിന്‌ ചെന്നൈയിലെ സര്‍ക്കാര്‍ ആശുപത്രിയില്‍ അന്തരിക്കുമ്പോള്‍ കാല്‍കാശിന്‌ വകയില്ലാത്ത ദരിദ്രനായിരുന്നു എന്നത് മലയാളി ലജ്ജയോടെ മാത്രം തിരിച്ചറിയേണ്ട യാഥാര്‍ത്ഥ്യമാണ്.
നമുക്ക് ബാബുരാജിന്‍റെ സംഗീതം മാത്രം മതിയായിരുന്നു ബാബുരാജ് എന്ന മനുഷ്യനെ ആവശ്യമില്ലായിരുന്നു.
