ലോക ഒന്നാം നമ്പര്‍ താരം റാഫേല്‍ നദാല്‍ റോം മാസ്റ്റേഴ്സ് ടെന്നീസ് ടൂര്‍ണമെന്‍റിന്‍റെ മൂന്നാം റൌണ്ടിലെത്തി. ഇറ്റാലിയന്‍ പ്രതീക്ഷയായിരുന്ന ആന്‍ഡ്രിയാസ് സെപ്പിയെ നേരിട്ടുള്ള സെറ്റുകളില്‍ തകര്‍ത്താണ് (6-2, 6-3) നദാല്‍ മൂന്നാം റൌണ്ടിലേക്ക് മാര്‍ച്ച് ചെയ്തത്.
ഒരു മണിക്കൂര്‍ 19 മിനുട്ടില്‍ മത്സരം സ്വന്തമാക്കിയ നദാല്‍ കളിമണ്‍ കോര്‍ട്ടിലെ തന്‍റെ അശ്വമേധം തുടര്‍ന്നു. ജയത്തോടെ കഴിഞ്ഞ വര്‍ഷം രണ്ടാം റൌണ്ടിലേറ്റ തോല്‍‌വിയുടെ ഓര്‍മകള്‍ മായ്ക്കാനും നദാ‍ലിനായി. കഴിഞ്ഞ സീസണില്‍ കളിമണ്‍ കോര്‍ട്ടിലെ നദാലിന്‍റെ ഏക തോല്‍‌വിയായിരുന്നു അത്.
2005 മുതല്‍ 2007 വരെ റോം മാസ്റ്റേഴ്സില്‍ തുടര്‍ച്ചയായി ചാമ്പ്യനായിരുന്ന നദാല്‍ കിരീടം തിരിച്ചു പിടിക്കാനാണ് ഇത്തവണ ഇറങ്ങുന്നത്. കഴിഞ്ഞ അഞ്ചു സീസണുകളില്‍ കളിമണ്‍ കോര്‍ട്ടില്‍ മത്സരിച്ച 143 മത്സരങ്ങളില്‍ നാലു മത്സരങ്ങളില്‍ മാത്രമെ നദാല്‍ അടിയറവ് പറഞ്ഞിട്ടുള്ളു. 23 കിരീടങ്ങളാണ് നദാല്‍ ഇക്കാലയളവില്‍ സ്വന്തം പേരില്‍ എഴുതിയത്.
