റോം മാസ്റ്റേഴ്സ് ടെന്നീസില്‍ നിലവിലെ ചാമ്പ്യന്‍ സെര്‍ബിയയുടെ നൊവാക് ജോക്കോവിച്ച് മൂന്നാം റൌണ്ടിലെത്തി. ലോക റാങ്കിംഗിലെ മൂന്നാം സ്ഥാനം നിലനിര്‍ത്താന്‍ ഇവിടെ കിരീടം നേടേണ്ടത് അത്യാവശ്യമായ ജൊക്കോവിച്ച് ആല്‍ബര്‍ട്ട് മൊണ്ടാനെസിനെയാണ് നേരിട്ടുള്ള സെറ്റുകളില്‍ (7-6, 6-0) തകര്‍ത്തത്.
ആദ്യ സെറ്റില്‍ 5-2ന് മുന്നിട്ടു നിന്ന ശേഷം ഒട്ടേറെ പിഴവുകള്‍ വരുത്തിയ ജോക്കോവിച്ച് എതിരാളിയ്ക്ക് ഒപ്പമെത്താന്‍ അവസരമൊരുക്കി. പീന്നീട് ടൈബ്രേക്കറില്‍ 4-2ന് പിന്നിട്ടു നിന്ന ശേഷമാണ് ജോക്കോവിച്ഛ് തിരിച്ചുവന്നത്.
എന്നാല്‍ രണ്ടാം സെറ്റില്‍ ഉജ്ജ്വല ഫോമിലേക്കുയര്‍ന്ന ജോക്കോവിച്ച് എതിരാളിക്ക് ഒറ്റ ഗെയിം പോലും നല്‍കാതെ സെറ്റും മത്സരവും സ്വന്തമാക്കുകയായിരുന്നു. 25 മിനുട്ടിലായിരുനു ജോക്കോവിച്ച് രണ്ടാം സെറ്റ് സ്വന്തമാക്കിയത്.
ഈ മാസമാദ്യം മോണ്ടി കാര്‍ലൊ മാസ്റ്റേഴ്സില്‍ നദാ‍ലിനോട് തോറ്റ ജോക്കോവിച്ചിന്‍റെ മൂന്നാം സ്ഥാനം ഭീഷണിയിലാണ്.
