ഉത്തര്‍പ്രദേശ് ഉള്‍പ്പെടെ നാലു സംസ്ഥാനങ്ങളില്‍ കൂടി ബിജെപി അധികാരത്തില്‍ ഏറ്റതിന് പിന്നാലെയാണ് ബീഫ് വേട്ട വീണ്ടും വാര്‍ത്തയാകുന്നത്. രാജസ്ഥാനിലെ ജെയ്പൂരില്‍ ബീഫ് വിളമ്പിയെന്ന് ആരോപിച്ച് ഹോട്ടല്‍ പൊലീസ് പൂട്ടിയും ഹോട്ടലുടമയെ അറസ്റ്റ് ചെയ്യുകയും ചെയ്തു. നയീം റബ്ബാനി എന്നയാളെയും ഹോട്ടല്‍ ജീവനക്കാരനേയുമാണ് പോലീസ് അറസ്റ്റ് ചെയ്തത്. ജയ്‌പൂരിലെ സിന്ധി ക്യാമ്പ് ഏരിയയിലെ ഹയാത്ത് റബ്ബാനി എന്ന ഹോട്ടലാണ് പൂട്ടിയത്.
ഹോട്ടല്‍ ലൈസന്‍സ് കാണിക്കാതെ വന്നതിനെ തുടര്‍ന്ന് മുനിസിപ്പല്‍ കോര്‍പ്പറേഷനാണ് ഹോട്ടല്‍ അടച്ചു പൂട്ടിയതെന്നും റിപ്പോര്‍ട്ടുണ്ട്. അതേസമയം ഹോട്ടലുടമയ്ക്കും ജോലിക്കാരനുമെതിരെ മാലിന്യ നിര്‍മ്മാര്‍ജ്ജന നിരോധന നിയമം, മതവികാരം വ്രണപ്പെടുത്തല്‍ എന്നീ വകുപ്പുകള്‍ ചുമത്തിയാണ് കേസ് എടുത്തിരിക്കുന്നത്.
