പുസ്തകം വായിക്കുമ്പോള്‍ ലഭിക്കുന്ന അറിവ് സോഷ്യല്‍ മീഡിയയില്‍ നിന്ന് ലഭിക്കില്ലെന്ന് കോണ്‍ഗ്രസ് നേതാവ് കൊടിക്കുന്നില്‍ സുരേഷ്. സോഷ്യല്‍ മീഡിയയിലൂടെ വളരാനാണ് ഇന്നത്തെ തലമുറയ്ക്ക് താല്‍പ്പര്യം. പുസ്തകം വായിക്കുമ്പോള്‍ ലഭിക്കുന്ന അറിവ് സോഷ്യല്‍ മീഡിയയില്‍ നിന്ന് ലഭിക്കില്ല. പുസ്തകങ്ങളിലേക്കും വായനയിലേക്കും പുതുതലമുറ മടങ്ങിവരണം - കൊടിക്കുന്നില്‍ പറഞ്ഞു.
വായനാശീലം അകലുന്നത് സാമൂഹിക-സാംസ്കാരിക അധഃപതനത്തിനു കാരണമാകും. വായനയിലൂടെയേ പുരോഗതി സാധ്യമാകൂ എന്ന ചിന്തയില്‍ നിന്നാണ് ഗ്രന്ഥശാലാ പ്രസ്ഥാത്തിന്റെ തുടക്കം. വായന വളര്‍ത്താന്‍ പി എന്‍ പണിക്കര്‍ നല്‍കിയ സംഭാവനകള്‍ അവിസ്മരണീയമാണ്. വായിച്ച് വളരാനുള്ള മലയാളികളുടെ പഴയകാല സ്വഭാവം തിരിച്ചുകൊണ്ടു വരാന്‍ കഴിയണമെന്നും അദ്ദേഹം പറഞ്ഞു.
