വിഎസിനു വേണ്ടി താന്‍ ലക്ഷങ്ങള്‍ പിരിച്ചു നല്കിയിട്ടുണ്ടെന്ന് വെള്ളാപ്പള്ളി നടേശന്‍

പ്രതിപക്ഷനേതാവ് വി എസ് അച്യുതാനന്ദനു വേണ്ടി താന്‍ ലക്ഷങ്ങള്‍ പിരിച്ചു നല്കിയിട്ടുണ്ടെന്ന് എസ് എന്‍ ഡി പി ജനറല്‍ സെക്രട്ടറി വെള്ളാപ്പള്ളി നടേശന്‍. മാതൃഭൂമി ന്യൂസിന്റെ ‘ചോദ്യം ഉത്തരം’ പരിപാടിയിലാണ് വെള്ളാപ്പള്ളി ഇങ്ങനെ പറഞ്ഞത്. 

വി എസിനു വേണ്ടി ലക്ഷക്കണക്കിന് രൂപ പിരിച്ചു കൊടുത്തിട്ടുണ്ട്. വെള്ളാപ്പള്ളി കള്ളപ്പണത്തിന്റെ തിണ്ണമിടുക്ക് കാട്ടുകയാണെന്ന വി എസിന്റെ ആരോപണത്തിന് മറുപടി പറയുകയായിരുന്നു അദ്ദേഹം.

കൂടെ നില്‍ക്കുന്ന എം എല്‍ എമാര്‍ക്കു വേണ്ടിയാണ് വി എസ് പണം ആവശ്യപ്പെട്ടത്. രസീത് പോലും ഇല്ലാതെ വാങ്ങിയ ഈ തുകയെങ്ങനെ സംഭാവനയാവും. പോരാത്തതിന് കൂടെ നില്‍ക്കുന്നവര്‍ക്കു വേണ്ടി വി എസ് ജോലിക്ക് ശുപാര്‍ശ ചെയ്തിട്ടുണ്ട്.

ജോലി വാഗ്ദാനം ചെയ്താണ് വി എസ് ടികെ പളനിക്കെതിരെ നീക്കം നടത്തിയത്. ഇങ്ങനെ വി എസ് ആവശ്യപ്പെട്ട വ്യക്തിക്ക് ജോലി നല്‍കുകയും ചെയ്തിട്ടുണ്ട് വെള്ളാപ്പള്ളി പറഞ്ഞു. മലമ്പുഴയില്‍ വി എസിന്റെ വിജയത്തിന് പിന്നില്‍ എസ് എന്‍ ഡി പിയായിരുന്നെന്ന് നേരത്തെ വെള്ളാപ്പള്ളി പറഞ്ഞു.