സ്‌കൂള്‍ കുട്ടികള്‍ക്കു മുമ്പിൽ നഗ്നതാ പ്രദർശനം നടത്തിയെന്ന ആരോപണത്തില്‍ നടൻ ശ്രീജിത്ത് രവിയുടെ അറസ്റ്റ് രേഖപ്പെടുത്തി. സ്‌കൂള്‍ വിദ്യാര്‍ഥിനികളെ അപമാനിച്ചു എന്ന കേസില്‍ പാലക്കാട് ഒറ്റപ്പാലം പൊലീസ് സ്റ്റേഷനില്‍ സ്വകാര്യ സ്‌കൂളിലെ പ്രിന്‍സിപ്പള്‍ നല്‍കിയ പരാതിയില്‍ ഇന്നലെയാണ് താരത്തെ കസ്റ്റഡിയിലെടുത്തത്.
അതേസമയം, ആരോപണം വാസ്തവവിരുദ്ധമെന്ന് ശ്രീജിത്ത് രവി പറഞ്ഞിരുന്നു.
ശ്രീജിത്ത് രവിയുടെ പ്രസ്‌താവന:-
‘പൊലീസ് പറയുന്ന സംഭവത്തിൽ ഉൾപ്പെട്ട കാറിന്റെ നമ്പർ എന്റേതു തന്നെയാണ്. പക്ഷേ അങ്ങനെയൊരു സംഭവം ഉണ്ടായിട്ടില്ല. വിദ്യാർഥിനികൾക്കു പറ്റിയ തെറ്റാകാനേ സാധ്യതയുള്ളൂ. ഒരുപക്ഷേ കാറിന്റെ നമ്പര്‍ എഴുതിയെടുത്തപ്പോള്‍ തെറ്റിപ്പോയതാകാം. പൊലീസിനു മുൻപിൽ എന്റെ ഭാഗം വിശദീകരിച്ചിട്ടുണ്ട്. ഉടൻതന്നെ ഇക്കാര്യത്തിൽ വ്യക്തത വരുമെന്നു പ്രതീക്ഷിക്കുന്നു.’
