മഴ അവധി പ്രഖ്യാപിക്കാത്തതിനു പത്തനംതിട്ട ജില്ലാ കലക്ടറുടെ ഔദ്യോഗിക ഫെയ്‌സ്ബുക്ക് പേജില്‍ ആത്മഹത്യാ ഭീഷണിയും അസഭ്യവും കമന്റ് ചെയ്ത വിദ്യാര്‍ഥികളുടെ മാതാപിതാക്കള്‍ക്ക് താക്കീത്. മോശം കമന്റ് ഇട്ട രണ്ട് വിദ്യാര്‍ഥികളുടെ അക്കൗണ്ട് സൈബര്‍ സെല്‍ വഴി കണ്ടെത്തി ജില്ലാ കലക്ടര്‍ എസ്.പ്രേം കൃഷ്ണന്‍ കുട്ടികളുടെ മാതാപിതാക്കളെ വിളിച്ചുവരുത്തുകയായിരുന്നു. കുട്ടികളുടെ കമന്റുകള്‍ കാണിച്ചുകൊടുത്ത ശേഷം മാതാപിതാക്കള്‍ക്ക് കലക്ടര്‍ താക്കീത് നല്‍കി. അവധി പ്രഖ്യാപിക്കണമെന്ന നിര്‍ബന്ധത്തില്‍ നിരവധി വിദ്യാര്‍ഥികളാണ് കലക്ടര്‍ ഓഫീസിലേക്ക് ഫോണ്‍ വിളിക്കുന്നതെന്നും കലക്ടര്‍ പറഞ്ഞു.
