പാല്‍പ്പൊടി പാക്കറ്റുകളില്‍ എംഡിഎംഎ, കൊണ്ടുവന്നത് സിനിമാ നടിമാര്‍ക്കു വേണ്ടിയെന്ന് വെളിപ്പെടുത്തല്‍; യുവാവ് അറസ്റ്റില്‍

MDMA

കോഴിക്കോട് ബൈപാസിനോടു ചേര്‍ന്നുള്ള ആഡംബര റിസോര്‍ട്ടിന്റെ പാര്‍ക്കിങ് ഏരിയയില്‍ നിന്ന് 510 ഗ്രാം എംഡിഎംഎ പിടികൂടി. കാളികാവ് സ്വദേശി മുഹമ്മദ് ഷബീബിനെയാണ് വാഴക്കാട് പൊലീസ് അറസ്റ്റ് ചെയ്തത്. പൊലീസിനു ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് ഇന്നലെ വൈകിട്ട് ജില്ലയിലെ പഞ്ചനക്ഷത്ര ഹോട്ടലിന്റെ പാര്‍ക്കിങ് ഏരിയയില്‍ നിന്ന് അരക്കിലോയില്‍ അധികം സിന്തറ്റിക്ക് ലഹരിമരുന്ന് പിടികൂടിയത്.

പ്രതി മുഹമ്മദ് ഷബീബ് ഒമാനില്‍ ജോലി ചെയ്യുകയായിരുന്നു. രണ്ട് മാസം മുന്‍പാണ് ഇയാള്‍ നാട്ടിലെത്തിയത്. ചെമ്മാട് സ്വദേശി അബു താഹിര്‍ ആണ് ഷബീബിന്റെ നിര്‍ദേശപ്രകാരം എംഡിഎംഎ വിദേശത്തുനിന്ന് എത്തിച്ചത്. ഒമാനില്‍നിന്നു പാല്‍പ്പൊടി പാക്കറ്റുകളിലാക്കി ലക്ഷങ്ങള്‍ വിലമതിക്കുന്ന ലഹരിമരുന്നാണ് കരിപ്പൂര്‍ വിമാനത്താവളം വഴി കടത്തുകയായിരുന്നു. തുടര്‍ന്ന് ഷബീബിന് കൈമാറി. ലഹരിമരുന്ന് സിനിമാ നടിമാര്‍ക്കു വേണ്ടിയാണ് കൊണ്ടുവന്നതെന്നാണ് പ്രതിയുടെ മൊഴി. 

ഹോട്ടലിന്റെ പാര്‍ക്കിങ് ഗ്രൗണ്ടില്‍ എംഡിഎംഎ കൈപ്പറ്റാന്‍ രണ്ട് സിനിമാ നടിമാര്‍ എറണാകുളത്തു നിന്ന് എത്തുമെന്നും അത് അവര്‍ക്ക് കൈമാറുകയായിരുന്നു ലക്ഷ്യമെന്നും പ്രതി പൊലീസിനോടു പറഞ്ഞു. ആര്‍ക്കു വേണ്ടിയാണ് ലഹരിമരുന്ന് കൊണ്ടുവന്നതെന്ന് പൊലീസ് വിശദമായി അന്വേഷിക്കും. നടിമാര്‍ ആരൊക്കെയാണെന്ന് ഷബീബിനു അറിവുണ്ടായിരുന്നില്ലെന്നാണ് പൊലീസും കരുതുന്നത്. കൊണ്ടോട്ടി ഡിവൈഎസ്പിയും സ്പെഷല്‍ ബ്രാഞ്ച് ഡിവൈഎസ്പിയും പ്രതിയെ ചോദ്യം ചെയ്തു.