ലോട്ടറി വില്‍പ്പനക്കാരനായ വയോധികന്റെ ബാഗും മോഷ്ടിച്ച കള്ളന്‍ ലോട്ടറി അടിക്കുമെന്ന് പ്രതീക്ഷിച്ചിരുന്നിട്ടുണ്ടാവില്ല. ബാഗിലെ കാശായിരുന്നു ലക്ഷ്യം. എന്നാല്‍ മോഷ്ടിച്ച ലോട്ടറിക്ക് സമ്മാനം നല്‍കിയാണ് ഭാഗ്യദേവതയുടെ പരീക്ഷണം. മോഷ്ടിച്ച സാധനങ്ങളുടെ കൂടെയുള്ള ലോട്ടറിക്കാണ് സമ്മാനം അടിച്ചത്. പൗര്‍ണമി ഭാഗ്യക്കുറിയുടെ 3329 എന്ന നമ്പറിനാണ് 5000 രൂപയുടെ സമ്മാനം ലഭിച്ചത്.
വടക്കഞ്ചേരി കനറാ ബാങ്കിന്റ എതിര്‍വശത്ത് ലോട്ടറി വില്‍ക്കുന്ന അറുപത്തിയഞ്ചുകാരന്‍ കണ്ണമ്പ്ര സ്വദേശി മജീദിന്റെ മൊബൈല്‍ ഫോണും, ലോട്ടറി സൂക്ഷിച്ച പണമടങ്ങിയ ബാഗുമാണ് കവര്‍ന്നത്. ഞായറാഴ്ച വൈകുന്നേരം നാലരയോടെയാണ് മോഷണം നടന്നത്. ലോട്ടറി വില്‍പനക്കാരന്‍ സംസാരിച്ചു നില്‍ക്കുമ്പോള്‍ പരിസരം നിരീക്ഷിച്ച മോഷ്ടാവ് ബാഗുമായി കടന്നുകളയുകയായിരുന്നു.
