മമ്പാട് ടൗണിലെ തുണിക്കടയുടെ ഗോഡൗണിലാണ് ശനിയാഴ്ച ഉച്ചയോടെ സംഭവം ഉണ്ടായത്. മലപ്പുറം കോട്ടയ്ക്കല്‍ വില്ലൂര്‍ പള്ളിത്തോട്ടിയില്‍ അലവി മകന്‍ മുജീബ് റഹ്മാന്‍ എന്ന 29 കാരനെയാണ് തൂങ്ങിമരിച്ച നിലയില്‍ കണ്ടെത്തിയത്. ഗോഡൗണില്‍ ആരോ തൂങ്ങിമരിച്ചു എന്ന് ജീവനക്കാരില്‍ ഒരാള്‍ പോലീസിനെ ഫോണില്‍ വിളിച്ചറിയിക്കുകയായിരുന്നു. വിവരം അറിഞ്ഞു പോലീസ് ഇന്‍സ്പെക്ടര്‍ വിഷ്ണുവിന്റെ നേതൃത്വത്തിലുള്ള സംഘം സ്ഥലത്തെത്തി ഗോഡൗണിന്റെ ഷട്ടര്‍ തുറന്നെങ്കിലും മൃതദേഹം കണ്ടില്ല. തുടര്‍ന്ന് നടത്തിയ പരിശോധനയില്‍ ഉള്ളിലെ മുറിയില്‍ നിലത്തു തുണികള്‍ കൊണ്ട് മൂടിയ നിലയിലായിരുന്നു മൃതദേഹം.
മുജീബിന്റെ ഭാര്യ പാണ്ടിക്കാട് പുലിക്കോട്ടില്‍ രഹ്നയുടെ മൊഴി പോലീസ് രേഖപ്പെടുത്തുകയും അസ്വാഭാവിക മരണത്തിനു കേസെടുക്കുകയും ചെയ്തു. പതിനേഴാം രാത്രി കൈകള്‍ കൂട്ടിക്കെട്ടിയ നിലയില്‍ മുജീബിന്റെ ഫോട്ടോ അജ്ഞാതന്‍ രഹ്നായ്ക്ക് അയച്ചുകൊടുത്തിരുന്നു. തുണിക്കട ഉടമയുടെ സ്ഥാപനത്തില്‍ നിന്ന് 64000 രൂപയുടെ വസ്തുക്കള്‍ ഇയാള്‍ കടം വാങ്ങിയതും പണം തിരികെ കൊടുത്തില്ല എന്ന വിവരവും പൊലീസിന് ലഭിച്ചു.
