മഹേന്ദ്ര സിംഗ് ധോണിയും വിരാട് കോഹ്‌ലിയും നിറം മങ്ങിയ ഐപിഎല്‍ സീസണാണ് ഇത്. മികച്ച പ്രകനം പുറത്തെടുക്കാന്‍ ഇരുവര്‍ക്കും സാധിക്കാതിരുന്നതാണ് ആരാധകരെ നിരാശപ്പെടുത്തിയത്. അതേസമയം, കളിക്കളത്തില്‍ നല്ല മുഹൂര്‍ത്തങ്ങള്‍ക്ക് സാക്ഷ്യം വഹിക്കാന്‍ ക്രിക്കറ്റ് പ്രേമികള്‍ക്ക് ഈ സീസണില്‍ സാധിച്ചു.
ആരാധക ഹൃദയങ്ങളില്‍ ഇടം നേടിയ ഇടപെടലുകളാണ് സണ്‍റൈസേഴ്‌സ് ഹൈദരാബാദ് താരം യുവരാജ് സിംഗില്‍ നിന്ന് കണ്ടത്. ചൊവ്വാഴ്‌ച നടന്ന മത്സരത്തില്‍ ഡല്‍ഹിക്കെതിരെ അര്‍ധസെഞ്ചുറിയുമായി യുവി കളം നിറഞ്ഞുവെങ്കിലും ആരാധകരെ സന്തോഷിപ്പിച്ച നിമിഷമുണ്ടായത്.
മത്സരത്തിനിടെ ഡല്‍ഹിയുടെ ബാറ്റ്‌സ്മാന്‍ ഋഷഭ് പന്തിന്റെ ഷൂ ലെയ്‌സ് അഴിഞ്ഞു. ആരുടെയെങ്കിലും സഹായത്തിനായി പന്ത് ചുറ്റും നോക്കിയെങ്കിലും ഇതാരും കളിയുടെ ആവേശത്തില്‍ ശ്രദ്ധിച്ചില്ല. എന്നാല്‍, ഋഷഭിന്റെ അടുത്ത് ഫീല്‍ഡ് ചെയ്യുകയായിരുന്ന യുവി കാര്യം മനസിലാക്കുകയും ഓടിയെത്തി ലെയ്‌സ് കെട്ടിക്കൊടുക്കുകയായിരുന്നു.
നേരത്തെ കൊല്‍ക്കത്ത നൈറ്റ് റൈഡേഴ്‌സിനെതിരായ മത്സരത്തില്‍ സിദ്ധാര്‍ത്ഥ് കൗറിനോട് ദേഷ്യപ്പെട്ട റോബിന്‍ ഉത്തപ്പയുടെ തോളില്‍ കൈയിട്ട് ഉപദേശം നല്‍കിയും യുവി താരമായിരുന്നു. യുവിയുടെ ഈ ഇടപെടലുകളുടെ ചിത്രങ്ങള്‍ സമൂഹമാധ്യമങ്ങള്‍ വൈറലാകുകയാണ്.
