വെറുതെ ഒരു രസത്തിനാണ് പലരും മദ്യപാനം തുടങ്ങുന്നത്. ഇത് ശരീരത്തിന് ഹാനികരമാണെന്ന് അറിഞ്ഞിട്ടും ദിവസവും മദ്യപിക്കുന്നവര്‍ നമുക്കിടയിലുണ്ട്. കുറച്ച് ദിവസം കഴിയുമ്പോള്‍ മദ്യം കുടിക്കാതിരിക്കാനാവാത്ത അവസ്ഥയിലേക്ക് നീങ്ങുന്നു. കൂടുതല്‍ മദ്യം കുടിക്കാനും പ്രേരണ ഉണ്ടാകുന്നു. ക്രമേണ മദ്യത്തിന് അടിമകളാകുന്ന ഇവര്‍ വീട്ടുകാര്‍ക്കും നാട്ടുകാര്‍ക്കുമൊക്കെ ഭാരമായി മാറുന്നു. ഇതില്‍ നിന്ന് മോചനം നേടണമെങ്കില്‍ ബോധപൂര്‍വമായ ശ്രമവും നിയന്ത്രണവുമൊക്കെ ആവശ്യമാണ്.
തുടര്‍ച്ചയായ മദ്യപാനം ശരീരത്തിലെ പ്രധാന ഭാഗങ്ങളുടെ പ്രവര്‍ത്തനത്തെ ദോഷകരമായി ബാധിക്കുന്നു. കരള്‍, മസ്തിഷ്‌കം, ഹൃദയം, വൃക്ക എന്നീ അവയവങ്ങളെ ആണ് പ്രധാനമായും ബാധിക്കുക. ഇതില്‍ തന്നെ കരളിനാണ് മുഖ്യമായും തകരാര്‍ സംഭവിക്കുക. തുടര്‍ച്ചയായ മദ്യപാനം കരള്‍ വീക്കത്തിന് കാരണമാകും. ഒരിക്കല്‍ ഇതുണ്ടായാല്‍ പൂര്‍വ്വ സ്ഥിതിയിലേക്ക് മടങ്ങുക പ്രയാസമാണ്. ആമാശയത്തില്‍ അമിതമദ്യപാനം മൂലം ദഹനസംബന്ധമായ തകരാര്‍ സംഭവിക്കുന്നു.
