അത് ഫ്രഞ്ച് താരങ്ങള്‍ക്കുള്ള കൊട്ട് തന്നെ; വിവാദ സെലിബ്രേഷനെ കുറിച്ച് വെളിപ്പെടുത്തി എമിലിയാനോ മാര്‍ട്ടിനെസ്

അര്‍ജന്റീനയുടെ ലോകകപ്പ് നേട്ടത്തില്‍ നിര്‍ണായക പങ്ക് വഹിച്ച താരമാണ് ഗോള്‍കീപ്പര്‍ എമിലിയാനോ മാര്‍ട്ടിനെസ്. ഫൈനലില്‍ ഫ്രാന്‍സിനെതിരെ അര്‍ജന്റീനയുടെ കാവലാള്‍ ആകുകയായിരുന്നു എമി. ടൂര്‍ണമെന്റില്‍ ഉടനീളം തിളങ്ങിയ എമിലിയാനോ മാര്‍ട്ടിനെസിനെ തേടി ഒടുവില്‍ ലോകകപ്പിലെ മികച്ച ഗോളിക്കുള്ള ഗോള്‍ഡന്‍ ഗ്ലൗവും എത്തി. ഗോള്‍ഡല്‍ ഗ്ലൗ ഏറ്റുവാങ്ങിയ ശേഷം എമി നടത്തിയ ആഹ്ലാദപ്രകടനം വലിയ വിവാദമായിരുന്നു. ലൈംഗികചുവയുള്ള ആംഗ്യം കാണിച്ചാണ് എമിലിയാനോ ആഘോഷിച്ചത്. ഇതിനെതിരെ നിരവധി പേരാണ് രംഗത്തെത്തിയത്. 

വിവാദ സെലിബ്രേഷനെ കുറിച്ച് എമിലിയാനോ ഇപ്പോള്‍ തുറന്നുപറയുകയാണ്. ഫ്രഞ്ച് താരങ്ങള്‍ നിരന്തരം തന്നെ പ്രകോപിപ്പിക്കുകയായിരുന്നെന്നും അവര്‍ക്കുള്ള മറുപടിയായാണ് ഈ ആക്ഷന്‍ കാണിച്ചതെന്നും എമിലിയാനോ പറഞ്ഞു. 

' ഫ്രഞ്ചുകാര്‍ എന്നെ ചീത്ത വിളിച്ചതുകൊണ്ടാണ് ഞാന്‍ അത് ചെയ്തത്. എന്റെ അഭിമാനം ഞാന്‍ പണയം വെച്ചിട്ടില്ല,' മാര്‍ട്ടിനെസ് പറഞ്ഞു. 

ഈ നേട്ടം ഞാന്‍ എന്റെ കുടുംബത്തിനു സമര്‍പ്പിക്കുന്നു. ഞാന്‍ വളരെ പാവപ്പെട്ട സ്ഥലത്തുനിന്ന് എത്തിയ ആളാണ്. വളരെ ചെറിയ പ്രായത്തില്‍ തന്നെ ഞാന്‍ ഇംഗ്ലണ്ടിലേക്ക് പോയി. ഈ നേട്ടം അവര്‍ക്ക് വേണ്ടിയും സമര്‍പ്പിക്കാന്‍ ഞാന്‍ ആഗ്രഹിക്കുന്നു - എമിലിയാനോ കൂട്ടിച്ചേര്‍ത്തു.