മമ്മൂട്ടിയും അമല്‍ നീരദും ബിഗ് ബിയുടെ രണ്ടാം ഭാഗവുമായി വരികയാണ്. ചിത്രത്തിൽ ദുൽഖർ സൽമാൻ ഉണ്ടാകുമെന്ന് വാർത്തകൾ ഉണ്ടായിരുന്നു. എന്നാൽ പിന്നീട് അമൽ നീരദ് തന്നെ ഈ വാർത്ത നിഷേധിച്ചിരുന്നു. ഇപ്പോഴിതാ, ബിലാലിൽ താൻ ഇല്ലെന്ന് ദുൽഖറും വ്യക്തമാക്കിയിരിക്കുകയാണ്.
'ഞാൻ ആ സിനിമയിൽ ഇല്ല. എന്നാൽ, അതിന്റെ ഓഡിഷന് പോയി നിൽക്കാൻ ആഗ്രഹമുണ്ട്. എന്റെ ദുബായ് ജീവിതവുമായി ഏറെ ബന്ധമു‌ള്ള സിനിമയാണ് ബിഗ്ബി. ഇവിടെ വർക്കിനായി വരുന്ന സമയത്താണ് ബിഗ് ബി റിലീസ് ചെയ്യുന്നത്. വാപ്പച്ചിയേയും കുടുംബത്തേയും മിസ് ചെയ്യുമ്പോഴൊക്കെ ബിഗ് ബിയുടെ ഡി വി ഡി ഇട്ട് കാണുമായിരുന്നു. - ദുബായില്‍ നടന്ന ഒരു അവാര്‍ഡ്ദാന ചടങ്ങിനിടെയാണ് ദുല്‍ഖര്‍ പറഞ്ഞു.
മമ്മൂട്ടിയുടെ കരിയറിലെ ഏറ്റവും അടിപൊളി കഥാപാത്രങ്ങളിലൊന്നായിരുന്നു ബിലാല്‍. ജെയിംസ്, ശിവ, ഡര്‍ന സരൂരി ഹൈ തുടങ്ങിയ രാംഗോപാല്‍ വര്‍മ ചിത്രങ്ങളുടെ ക്യാമറാമാന്‍ എന്ന നിലയില്‍ നിന്ന് ബിഗ്ബിയിലൂടെ സംവിധായകനായി അമല്‍ നീരദ് മാറിയപ്പോള്‍, ആ സിനിമയ്ക്ക് ക്യാമറ ചലിപ്പിക്കാന്‍ അവസരം ലഭിച്ചത് സമീര്‍ താഹിറിനാണ്. ഗോപി സുന്ദറായിരുന്നു ബി ജി എം.
