പരമ്പര സ്വന്തമാക്കി ഓസ്ട്രേലിയ; മെല്‍ബണ്‍ ഏകദിനത്തില്‍ ഓസീസിന് മൂന്നു വിക്കറ്റ് വിജയം

ഇന്ത്യയ്ക്കെതിരെയുള്ള അഞ്ചു മത്സരങ്ങളുടെ ഏകദിന പരമ്പര ഓസ്ട്രേലിയ സ്വന്തമാക്കി. ഇന്ന് മെല്‍ബണില്‍ നടന്ന മൂന്നാം ഏകദിനത്തില്‍ ഇന്ത്യ ഉയര്‍ത്തിയ 296 എന്ന വിജയലക്‌ഷ്യം ഏഴു വിക്കറ്റ് നഷ്‌ടത്തില്‍ 48.5 ഓവറില്‍ ഓസീസ് മറികടന്നു. മൂന്നു വിക്കറ്റിനാണ് ഓസീസിന്റെ വിജയം. ഇതോടെ അഞ്ചു മത്സരങ്ങളുടെ ഏകദിനത്തില്‍ മൂന്നു വിജയവുമായി ഓസീസ് ഒന്നാമതെത്തി.

ആദ്യ രണ്ടു ഏകദിനങ്ങളിലും 300 റണ്‍സിനു മേലെ നേടി ബാറ്റിംഗില്‍ മികച്ച പ്രകടനം പുറത്തെടുത്ത ഇന്ത്യയ്ക്ക് ബോളിംഗിലായിരുന്നു പിഴച്ചത്. ഇന്നും ബോളര്‍മാര്‍ നിരാശപ്പെടുത്തി എന്ന് പറയുന്നതാകും ശരി. 

ബാറ്റ്സ്‌മാന്‍മാര്‍ കൂടുതല്‍ സമ്മര്‍ദ്ദത്തിനു ശ്രമിക്കണമെന്ന ക്യാപ്‌റ്റന്റെ ഉപദേശമൊന്നും ഫലം കണ്ടില്ല. 330 - 34- റണ്‍സെങ്കിലും നേടണമെന്നായിരുന്നു ക്യാപ്‌റ്റന്റെ നിര്‍ദ്ദേശമെങ്കിലും ഇന്ന് 300 കടക്കാന്‍ പോലും ഇന്ത്യന്‍ ടീമിന് കഴിഞ്ഞില്ല.

ഓസ്ട്രേലിയയ്ക്ക് വേണ്ടി മികച്ച പ്രകടനം പുറത്തെടുത്ത മാക്‌സ്‌വെല്‍  ആണ് മാന്‍ ഓഫ് ദ മാച്ച്.