അരനൂറ്റാണ്ട് മുന്‍പ് വെള്ളിത്തിരയില്‍ ആദ്യമായി മുഖം കാണിച്ച മമ്മൂട്ടി എണ്ണമറ്റ കഥാപാത്രങ്ങളെയാണ് നമുക്ക് സമ്മാനിച്ചത്. വ്യത്യസ്ത കഥാപാത്രങ്ങളിലൂടെ അഭിനയത്തിന്റെ കൊടുമുടി കയറി മമ്മൂട്ടി മൂന്ന് ദേശീയ അവാര്‍ഡുകള്‍ അടക്കം നിരവധി പുരസ്‌കാരങ്ങള്‍ സ്വന്തമാക്കിയിട്ടുണ്ട്. എന്നാല്‍, ഇന്ത്യയിലെ തന്നെ മികച്ച നടന്‍മാരില്‍ ഒരാളായി അറിയപ്പെടുന്ന മമ്മൂട്ടി ഡാന്‍സിന്റെ കാര്യത്തില്‍ അല്‍പ്പം പിന്നിലാണ്. തനിക്ക് ഡാന്‍സ് കളിക്കാന്‍ അറിയില്ലെന്ന കാര്യം മമ്മൂട്ടി തന്നെ പരസ്യമായി പലപ്പോഴും പറഞ്ഞിട്ടുണ്ട്.
'എനിക്ക് ഡാന്‍സ് ഇഷ്ടമാണ്. ഞാന്‍ നന്നായി ഡാന്‍സ് ആസ്വദിക്കും. പക്ഷേ, എന്നെക്കൊണ്ട് സാധിക്കുന്നില്ല. അതാണ് എന്റെ പ്രശ്‌നം. നന്നായി ഡാന്‍സ് കളിക്കുന്നവരോട് എനിക്ക് അസൂയയാണ്. ഡാന്‍സ് കളിക്കാന്‍ എനിക്ക് ആത്മവിശ്വാസമില്ല. ഞാന്‍ ഡാന്‍സ് കളിക്കുമ്പോള്‍ എന്റെ തൊട്ടടുത്ത് നില്‍ക്കുന്നവരെ നോക്കും. എനിക്കൊരു പേടിയാണ്, ഞാന്‍ ചെയ്യുന്ന സ്റ്റെപ്പ് തെറ്റാണോ എന്ന്. ഇക്കാര്യത്തില്‍ ഒട്ടും ആത്മവിശ്വാസമില്ല,' മമ്മൂട്ടി പറഞ്ഞു.
