തിങ്കളാഴ്ചത്തെ ബോക്‌സോഫീസ് കളക്ഷനില്‍ കുത്തനെ വീണ് ശങ്കര്‍- കമല്‍ഹാസന്‍ സിനിമയായ ഇന്ത്യന്‍ 2. വാരാന്ത്യം കഴിഞ്ഞെത്തുന്ന ആദ്യ ദിവസമായ തിങ്കളാഴ്ചയാണ് ഒരു സിനിമയുടെ യഥാര്‍ഥ റിസള്‍ട്ട് വ്യക്തമാവുക എന്നാണ് ട്രേഡ് അനലിസ്റ്റുകള്‍ പറയാറുള്ളത്. തിങ്കളാഴ്ച ടെസ്റ്റില്‍ ദയനീയമായ വീഴ്ചയാണ് ഇന്ത്യന്‍ 2വിന് സംഭവിച്ചതെന്ന് തിങ്കളാഴ്ച ത്തെ കളക്ഷന്‍ റെക്കോര്‍ഡ് വ്യക്തമാക്കുന്നു.
ജൂണ്‍ 12ന് റിലീസായത് മുതല്‍ എല്ലാഭാഗത്ത് നിന്നും നെഗറ്റീവ് റിവ്യൂവാണ് സിനിമയ്ക്ക് ലഭിച്ചുകൊണ്ടിരുന്നത്. വന്‍ ചിത്രങ്ങളുടെ ഭാവി വ്യക്തമാവുക തിങ്കളാഴ്ച കളക്ഷനില്‍ ആകും എന്നതിനാല്‍ തന്നെ ഇന്ത്യന്‍ 2വിന് തിങ്കളാഴ്ച പ്രധാനമായിരുന്നു. എന്നാല്‍ ഞായറാഴ്ച 15.35 ആഭ്യന്തര വിപണിയില്‍ നേടിയ ഇന്ത്യന്‍ 2 വിന് തിങ്കളാഴ്ച 3.15 കോടി രൂപ മാത്രമാണ് ഇന്ത്യന്‍ ബോക്‌സോഫീസില്‍ നിന്നും നേടാനായത്. റിലീസ് ദിനമായ വെള്ളിയാഴ്ച 25.6 കോടിയും ശനിയാഴ്ച 18.2 കോടി രൂപയുമായിരുന്നു സിനിമയുടെ കളക്ഷന്‍.
ആദ്യദിനത്തില്‍ തന്നെ ശക്തമായ വിമര്‍ശനം നേരിട്ടതോടെ സിനിമയുടെ 20 മിനിറ്റോളം വരുന്ന ദൃശ്യങ്ങള്‍ അണിയറക്കാര്‍ നേരത്തെ നീക്കം ചെയ്തിരുന്നു. എന്നാല്‍ ഇതൊന്നും തന്നെ ഗുണം ചെയ്തില്ലെന്നാണ് തിങ്കളാഴ്ചയിലെ കളക്ഷന്‍ കണക്കുകള്‍ കാണിക്കുന്നത്. തിങ്കളാഴ്ച ടെസ്റ്റില്‍ പരാജയമായതോടെ ശങ്കറിന്റെ കരിയറിലെ തന്നെ ഏറ്റവും വലിയ പരാജയങ്ങളില്‍ ഒന്നാകും ഇന്ത്യന്‍ 2 എന്ന് വ്യക്തമായിരിക്കുകയാണ്.
