രഘുനാഥ് പാലേരിയുടെ തിരക്കഥയില്‍ സിബി മലയില്‍ സംവിധാനം ചെയ്ത ചിത്രമാണ് 'ദേവദൂതന്‍'. മോഹന്‍ലാല്‍, ജയ പ്രദ, വിനീത് കുമാര്‍, മുരളി, ജനാര്‍ദ്ദനന്‍ എന്നിവരാണ് ദേവദൂതനില്‍ പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. 2000 ല്‍ റിലീസ് ചെയ്ത ദേവദൂതന്‍ അന്ന് തിയറ്ററുകളില്‍ വന്‍ പരാജയമായെങ്കിലും ഇന്ന് ഈ സിനിമയ്ക്ക് വലിയ ആരാധകവൃന്ദമുണ്ട്. അതുകൊണ്ടാണ് നൂതന സാങ്കേതിക വിദ്യയുടെ സഹായത്തോടെ ദേവദൂതന്‍ റി റിലീസിനു ഒരുങ്ങുന്നത്. ജൂലൈ 26 നാണ് ദേവദൂതന്‍ 4കെ ദൃശ്യ മികവോടെ വീണ്ടും തിയറ്ററുകളില്‍ എത്തുക.
