ജന്മ നക്ഷത്രം തുടങ്ങി യാത്രതിരിക്കുന്ന ദിവസത്തെ നക്ഷത്രം വരെ എണ്ണിയാല്‍ 1, 3, 9, 10, 11, 18, 19, 20, 27 എന്നിവയില്‍ ഒന്നുവന്നാല്‍ മരണഭയവും 12, 13, 14, 15, 16, 17 എന്നിവയില്‍ ഒന്നുവന്നാല്‍ ദു:ഖവും മറ്റുള്ള സംഖ്യകള്‍ വന്നാല്‍ ശുഭവും ഫലം.
യാത്ര പുറപ്പെടുന്ന സമയത്തെ ആഴ്ച, നക്ഷത്രം, തിഥി, ലഗ്നം എന്നിവകളുടെ സംഖ്യയെ ഒരുമിച്ചുകൂട്ടി ഒമ്പത്കൊണ്ട് ഹരിച്ചാല്‍ ശിഷ്ടം ഒന്ന് വന്നാല്‍ മൃത്യുപഞ്ചകം, 2 വന്നാല്‍ അഗ്നിപഞ്ചകം, 3 വന്നാല്‍ നിഷ്പഞ്ചകം, 4 വന്നാല്‍ രാജപഞ്ചകം, 5 വന്നാല്‍ നിഷ്പഞ്ചകം, 6 വന്നാല്‍ രക്തപഞ്ചകം, 7 വന്നാല്‍ നിഷ്പഞ്ചകം, 8 വന്നാല്‍ രോഗപഞ്ചകം, 9 വന്നാല്‍ നിഷ്പഞ്ചകം എന്നും കണക്കാക്കണം.
ജന്മാഷ്ടമ രാശിയില്‍ വിരുന്നുണ്ണുകയും രാജസേവചെയ്യുകയും ദ്രവ്യം ആര്‍ജ്ജിക്കുകയും യുദ്ധം ചെയ്യുകയും ആന, തേര്, കുതിര എന്നിവകളുടെ മേലേറുകയും ആയുധാഭ്യാസം നടത്തുകയും ചെയ്യാം. എന്നാല്‍, മറ്റുള്ള യാതൊരു ശുഭകര്‍മ്മങ്ങള്‍ക്കും ജന്മാഷ്ടമ രാശി നന്നല്ല.
ഊര്‍ദ്ധ്വമുഖ നക്ഷത്രങ്ങള്‍ സര്‍വ്വ കര്‍മ്മങ്ങള്‍ക്കും ശുഭത്തേയും അധോമുഖ നക്ഷത്രങ്ങള്‍ വിനാശത്തെയും തിര്യന്മുഖ നക്ഷത്രങ്ങള്‍ ധനനഷ്ടത്തെയും ഉണ്ടാക്കുമെന്നത് മുഹൂര്‍ത്തവിഷയത്തില്‍ പരിഗണിക്കേണ്ടതാണ്. എന്നാല്‍, അധോമുഖ നക്ഷത്രങ്ങള്‍ കിണര്‍,കുളം, കുഴി എന്നിവ നിര്‍മ്മിക്കുന്നതിനും കളികള്‍ക്കും ഗണിതാരംഭത്തിനും നല്ലതാ‍ണ്. തിര്യന്മുഖ നക്ഷത്രങ്ങള്‍ കുതിര, ആന, ഒട്ടകം, പോത്ത്, കഴുത, കാള എന്നിവയെ വാങ്ങുന്നതിനും വില്‍ക്കുന്നതിനും ജലയന്ത്രം ഉണ്ടാക്കുന്നതിനും കൃഷി ആയുധങ്ങള്‍ ഉണ്ടാക്കുന്നതിനും വാതില്‍കാല്‍, തൂണ് മുതലായവ നാട്ടുന്നതിനും ഉത്തമമാണ്.
