സമീപവാസിയുടെ വീട്ടില്‍ പാമ്പ് കയറിയതിനെ തുടര്‍ന്ന് അവരുടെ ഉച്ചത്തിലുള്ള നിലവിളികേട്ടാണ് രന്തു അവിടെയെത്തിയത്. ഉടന്‍ തന്നെ ഇയാള്‍ വീടിനുള്ളില്‍ കയറുകയും പാമ്പിനെ പിടികൂടുകയും ചെയ്തു. കൈയ്യില്‍ ചുറ്റി കയറിയ പാമ്പ് രന്തുവിനെ നിരവധി തവണ കടിച്ചു. വേദന സഹിക്കാതെ വന്നപ്പോളാണ് പാമ്പിനെ രന്തു തിരിച്ച് കടിച്ചത്. കടിയേറ്റ ഉടന്‍ തന്നെ പാമ്പ് ചാകുകയും ചെയ്തു.
എന്നാല്‍, തിരികെ വീട്ടിലെത്തിയ രന്തുവിന്റെ ശരീരത്തില്‍ നീലനിറം പടര്‍ന്നതു കണ്ടെത്തിയ വീട്ടുകാര്‍ അദ്ദേഹത്തെ ഉടന്‍ തന്നെ ആശുപത്രിയില്‍ എത്തിച്ചു. എന്നാല്‍ മാരക വിഷമുള്ള പാമ്പാണ് അദ്ദേഹത്തെ കടിച്ചതെന്നും നില വളരെ ഗുരുതരമാണെന്നും ആശുപത്രി അധികൃതര്‍ അറിയിച്ചു. തുടര്‍ന്ന് അത്യാഹിത വിഭാഗത്തില്‍ പ്രവേശിപ്പിച്ച രന്തു വെള്ളിയാഴ്ച വൈകീട്ടോടെ മരണത്തിനു കീഴടങ്ങുകയായിരുന്നു.
