ചെങ്ങന്നൂര്‍ ഉപതെരഞ്ഞെടുപ്പില്‍ ബി ജെ പി ഇത്തവണയും മൂന്നാം സ്ഥാനത്തായിരിക്കുമെന്ന് സി പി എം സംസ്ഥാന സെക്രട്ടറി കോടിയേരി ബാലകൃഷ്ണന്‍. ഇടതുമുന്നണിക്ക് ഭൂരിപക്ഷവും വോട്ടും വര്‍ധിക്കും. എല്‍ഡിഎഫും യുഡിഎഫും തമ്മിലാണ് മത്സരം. ഇതില്‍ എല്‍ഡിഎഫ് പ്രചാരണത്തില്‍ ഏറെ മുമ്പോട്ടുപോയിക്കഴിഞ്ഞു. കഴിഞ്ഞ തവണ മൂന്നാം സ്ഥാനത്തായിരുന്ന ബിജെപി ഇത്തവണയും മൂന്നാം സ്ഥാനത്തുതന്നെ ആയിരിക്കും - കോടിയേരി വ്യക്തമാക്കി.
ബിജെപി ബന്ധം ഉപേക്ഷിക്കാന്‍ ബി ഡി ജെ എസ് തയ്യാറാകണം. ശ്രീനാരായണഗുരുവിന്റെ ആദര്‍ശങ്ങളിലൂന്നിയാണ് ബിഡിജെഎസ് പ്രവര്‍ത്തിക്കേണ്ടത്. ബിജെപി - ബി ഡി ജെ എസ് ബന്ധത്തിന് അധികം ആയുസില്ലെന്ന് രണ്ടുവര്‍ഷം മുമ്പുതന്നെ സി പി എം പറഞ്ഞിരുന്നു. ബിജെപിയുമായി നിസ്സഹകരണം തുടരാനുള്ള ബിഡിജെഎസിന്റെ തീരുമാനം എന്‍ഡിഎയുടെ തകര്‍ച്ചയ്ക്ക് ആക്കം കൂട്ടുന്നതാണെന്നും കോടിയേരി വ്യക്തമാക്കി.
