2009ൽ ലാസ് വേഗാസിലെ ഒരു ഹോട്ടലിൽ വച്ച് റൊണാൾഡോ തന്നെ ബലാൽസംഗം ചെയ്തുവെന്നും ഇത് ഒത്തുതീർപ്പാക്കാൻ മൂന്നരലക്ഷം യൂറോ വാഗ്ദാനം ചെയ്തുവെന്നുമാണ് മയോർഗ അടുത്തിടെ വെളിപ്പെടുത്തിയത്. രണ്ടു വർഷം മുൻപ് വിവാദമായി പിന്നീട് കെട്ടടങ്ങിയ കേസിന് പരാതിക്കാരി നേരിട്ടു വന്നതോടെയാണ് ഇപ്പോൾ വീണ്ടും മാധ്യമ ശ്രദ്ധ ലഭിക്കുന്നത്.
ഒന്നര വർഷം മുൻപ് വിക്കിലീക്ക്സിന്റെ ഫുട്ബോൾ പതിപ്പായ ഫുട്ബോൾ ലീക്സ് പുറത്തു വിട്ട വിവരങ്ങളുടെ അടിസ്ഥാനത്തിൽ ഡെർ സ്പീഗൽ തന്നെയാണ് ഈ വാർത്ത പുറത്തു വിട്ടത്. സംഭവവുമായി ബന്ധപ്പെട്ട് അധികാരികൾക്ക് റൊണാൾഡോ നൽകിയ മൊഴി ഇപ്പോൾ അദ്ദേഹത്തിനെതിരെ കൊത്തുമോയെന്നാണ് ആരാധകർ നോക്കിക്കാണുന്നത്. പരസ്പര സമ്മതത്തോടെയുള്ള ലൈംഗിക ബന്ധമാണ് നടന്നതെന്നാണ് റൊണാൾഡോ അന്നു പറഞ്ഞത്. അതോടൊപ്പം, ഇത് തടയാൻ മയോർഗ ശ്രമം നടത്തിയിരുന്നുവെന്നും ഇതു വേണ്ടെന്നു പറഞ്ഞിരുന്നതായും റൊണാൾഡോ തന്നെ തുറന്നു സമ്മതിക്കുന്നുണ്ട്.
