കേട്ടയം പ്രദീപ് സിനിമയിലുള്ളവര്‍ക്ക് സ്‌നേഹനിധിയായ പ്രദീപേട്ടനാണ്. എല്ലാവരോടും സ്‌നേഹത്തോടും എളിമയോടും മാത്രം സംസാരിക്കുന്ന പ്രദീപേട്ടന്‍. സംവിധായകരോടും തിരക്കഥാകൃത്തുക്കളോടും അവരുടെ പുതിയ സിനിമയില്‍ അവസരം നല്‍കുമോ എന്ന് അങ്ങോട്ട് പോയി ചോദിക്കുന്ന മുതിര്‍ന്ന നടന്‍മാരില്‍ ഒരാള്‍. പ്രദീപ് അത്രത്തോളം അഭിനയത്തെ സ്‌നേഹിച്ചിരുന്നു. കഥാപാത്രം ചെറുതായാലും പരിഭവങ്ങളൊന്നും ഇല്ലാതെ പ്രദീപ് സെറ്റിലേക്ക് എത്തും. ഏത് കഥാപാത്രവും ചെയ്യാന്‍ പ്രദീപേട്ടന്‍ തയ്യാറായിരിക്കുമെന്ന് സംവിധായകരും തിരക്കഥാകൃത്തുക്കളും ഓര്‍ക്കുന്നു.
എല്ലാവരോടും അടുത്ത സൗഹൃദം കാത്തുസൂക്ഷിക്കുന്ന ആളാണ് പ്രദീപ്. സിനിമയിലുള്ള സുഹൃത്തുക്കള്‍ക്ക് ഗുഡ് മോണിങ്ങും ഗുഡ് നൈറ്റും മെസേജ് അയക്കുന്ന തനി സാധാരണക്കാരന്‍. എല്ലാവരുമായുള്ള സൗഹൃദം കാത്തുസൂക്ഷിക്കാന്‍ പ്രദീപ് അത്രത്തോളം ശ്രദ്ധിച്ചിരുന്നു. മെസേജ് അയച്ച് എല്ലാവരോടും സൗഹൃദം പുതുക്കാന്‍ പ്രദീപേട്ടന്‍ ഇഷ്ടപ്പെട്ടിരുന്നെന്ന് സിനിമ ഇന്‍ഡസ്ട്രിക്കുള്ളിലെ സുഹൃത്തുക്കള്‍ ഓര്‍ക്കുന്നു.
