ഇത്രയും വലിയ ശുചീകരണ പ്രവര്‍ത്തനങ്ങള്‍ രാജ്യം മുമ്പെങ്ങും കണ്ടിട്ടില്ല. മന്ത്രിമാരും എം എല്‍ എമാരും മറ്റ് ജനപ്രതിനിധികളും സര്‍ക്കാര്‍ ഉദ്യോഗസ്ഥരും സന്നദ്ധപ്രവര്‍ത്തകരുമെല്ലാം ചേര്‍ന്ന് ഒരു നാടിനെ വീണ്ടെടുക്കുന്നത് കാണണമെങ്കില്‍ കുട്ടനാട്ടിലേക്ക് ചെല്ലണം. അവിടെ മന്ത്രിമാരായ ജി സുധാകരന്‍റെയും തോമസ് ഐസക്കിന്‍റെയും നേതൃത്വത്തില്‍ ക്ലീനിംഗ് ജോലികള്‍ പുരോഗമിക്കുകയാണ്.
ഓരോ വീടും തങ്ങളുടെ സ്വന്തം വീടാണെന്ന രീതിയിലാണ് ഏവരും ശുചീകരണ പ്രവര്‍ത്തനങ്ങളില്‍ ഏര്‍പ്പെടുന്നത്. വീടുകളില്‍ നിറഞ്ഞിരിക്കുന്ന ചെളി ആദ്യം നീക്കം ചെയ്യും. പിന്നീട് ബ്ലീച്ചിംഗ് പൌഡര്‍ ലായനി ഒഴിച്ച് അണുവിമുക്തമാക്കും. അതിന് ശേഷം ശുദ്ധജലമുപയോഗിച്ച് ക്ലീനിംഗ്. വീടിന്‍റെ മുക്കും മൂലയുമെല്ലാം വൃത്തിയായി കഴുകി തുടയ്ക്കും. ജനാലകളും മേല്‍ക്കൂരകള്‍ വരെയും വൃത്തിയാക്കും. ഒടുവില്‍ വീട്ടിലെ എല്ലാവര്‍ക്കും പ്രതിരോധമരുന്നും ആഹാരവും നല്‍കി പ്രവര്‍ത്തകര്‍ മടങ്ങും.
ഇന്നത്തെ ശുചീകരണം പ്രവര്‍ത്തനങ്ങള്‍ അവസാനിക്കുമ്പോള്‍ അരലക്ഷത്തോളം വീടുകള്‍ വൃത്തിയാകും. ഇതേ പ്രവര്‍ത്തനം തന്നെ മറ്റ് ജില്ലകളിലെയും എല്ലാ സ്ഥലങ്ങളിലേക്കും വ്യാപിക്കുകയാണ്. ഇതൊക്കെ നടക്കുമോ എന്ന് സംശയം പ്രകടിപ്പിച്ചവരൊക്കെ ഇപ്പോള്‍ എല്ലാ സംശയവും മാറ്റിവച്ച് സഹജീവികള്‍ക്ക് പുതുജീവന്‍ പകരാനായി തുനിഞ്ഞിറങ്ങിയിരിക്കുകയാണ്.
