ഓപ്പണര്‍ ശുഭ്മാന്‍ ഗില്ലിനെ നഷ്ടമായപ്പോള്‍ മൂന്നാമനായാണ് സഞ്ജു ക്രീസിലെത്തിയത്. 6-1 എന്ന നിലയില്‍ പതറിപ്പോയ ഇന്ത്യയെ അഭിഷേക് ശര്‍മയെ കൂട്ടുപിടിച്ച് തകര്‍ച്ചയിലേക്ക് വീഴാതെ കാക്കാന്‍ സഞ്ജുവിനു സാധിച്ചു. സ്‌കോര്‍ ബോര്‍ഡില്‍ 72 റണ്‍സ് ആയപ്പോള്‍ ഇന്ത്യക്ക് രണ്ടാം വിക്കറ്റ് നഷ്ടമായി. തൊട്ടുപിന്നാലെ ഹാര്‍ദിക് പാണ്ഡ്യയും കൂടാരം കയറി. ഇന്ത്യ 73-3 എന്ന നിലയില്‍ പ്രതിരോധത്തില്‍. എന്നാല്‍ ഇതൊന്നും സഞ്ജുവിനെ തളര്‍ത്തിയില്ല. വളരെ ശ്രദ്ധിച്ചു ഇന്നിങ്‌സ് മുന്നോട്ടു കൊണ്ടുപോയ സഞ്ജു 18-ാം ഓവറിലെ നാലാം പന്തില്‍ പുറത്താകുമ്പോള്‍ ഇന്ത്യയുടെ സ്‌കോര്‍ 171 ല്‍ എത്തിയിരുന്നു. തനിക്കു ലഭിച്ച അവസരം നന്നായി വിനിയോഗിക്കാന്‍ താരത്തിനു സാധിച്ചു.
