Rohit Sharma vs Mohammed Shami: ബോര്‍ഡര്‍-ഗാവസ്‌കര്‍ ട്രോഫിയിലെ ശേഷിക്കുന്ന ടെസ്റ്റ് മത്സരങ്ങള്‍ക്ക് മുഹമ്മദ് ഷമിയെ ടീമില്‍ ഉള്‍പ്പെടുത്തണമെന്ന ആവശ്യം ഇന്ത്യന്‍ ആരാധകര്‍ക്കിടയില്‍ ശക്തമായിരിക്കുകയാണ്. സയിദ് മുഷ്താഖ് അലി ട്രോഫിയില്‍ ഷമി മികച്ച ഫോമിലാണ്. എന്നാല്‍ ഷമി പരുക്കില്‍ നിന്ന് പൂര്‍ണമായി മുക്തനായിട്ടില്ലെന്ന തരത്തിലാണ് ഇന്ത്യന്‍ നായകന്‍ രോഹിത് ശര്‍മയുടെ പ്രതികരണങ്ങള്‍. ടെസ്റ്റ് ടീമിലേക്ക് ഷമിയെ തിരിച്ചുവിളിക്കാത്തത് രോഹിത് ശര്‍മയുടെ താല്‍പര്യക്കുറവിനെ തുടര്‍ന്നാണെന്നാണ് ഇപ്പോള്‍ പുറത്തുവരുന്ന റിപ്പോര്‍ട്ടുകള്‍.
ഇന്ത്യ-ന്യൂസിലന്‍ഡ് ടെസ്റ്റ് പരമ്പരയ്ക്കിടെ ഷമിയും രോഹിത്തും തര്‍ക്കിച്ചതായാണ് പുറത്തുവരുന്ന വിവരം. ന്യൂസിലന്‍ഡിനെതിരായ ടെസ്റ്റ് പരമ്പരയുടെ സമയത്ത് ഷമിയുടെ കാര്യത്തെ കുറിച്ച് രോഹിത് പ്രതികരിച്ചിരുന്നു. ബോര്‍ഡര്‍ - ഗാവസ്‌കര്‍ ട്രോഫിയില്‍ ഷമി കളിക്കുമോയെന്നു ചോദിച്ചപ്പോള്‍ താരം പൂര്‍ണമായി ഫിറ്റല്ലെന്നായിരുന്നു രോഹിത്തിന്റെ വിശദീകരണം. ഇത് ഷമിയെ അസ്വസ്ഥനാക്കിയതായാണു റിപ്പോര്‍ട്ടുകള്‍.
' ന്യൂസിലന്‍ഡ് പരമ്പരയിലെ ബെംഗളൂരുവില്‍ നടന്ന ആദ്യ ടെസ്റ്റിനിടെ രോഹിത്തും ഷമിയും കൂടിക്കാഴ്ച നടത്തിയിരുന്നു. ആ സമയത്ത് ബെംഗളൂരുവിലെ ദേശീയ ക്രിക്കറ്റ് അക്കാദമിയില്‍ പരിശീലനത്തിലായിരുന്നു ഷമി. ന്യൂസിലന്‍ഡ്, ഓസ്‌ട്രേലിയ ടെസ്റ്റ് പരമ്പരകളില്‍ താന്‍ ഉണ്ടാകുമോ എന്ന മാധ്യമപ്രവര്‍ത്തകരുടെ ചോദ്യത്തിനു രോഹിത് നല്‍കിയ മറുപടി ഷമിക്ക് ഇഷ്ടപ്പെട്ടില്ല. ഈ വിഷയത്തെ ചൊല്ലി ഷമിയും രോഹിത്തും പരസ്പരം തര്‍ക്കിച്ചു,' ജാഗരണ്‍ റിപ്പോര്‍ട്ടില്‍ പറയുന്നു.
