Lok Sabha Election 2024: ലോക്‌സഭാ തിരഞ്ഞെടുപ്പില്‍ മത്സരിക്കണമെന്ന് കെപിസിസി അധ്യക്ഷന്‍ കെ.സുധാകരന് നിര്‍ദേശം നല്‍കി എഐസിസി. സിറ്റിങ് എംപിമാര്‍ മത്സരരംഗത്തു നിന്ന് മാറിനില്‍ക്കരുതെന്ന് എഐസിസി നേതൃത്വം കടുപ്പിച്ചു. കെപിസിസി അധ്യക്ഷനായതിനാല്‍ തിരഞ്ഞെടുപ്പില്‍ മത്സരിക്കുന്നില്ലെന്ന നിലപാടിലായിരുന്നു സുധാകരന്. എന്നാല്‍ കണ്ണൂരില്‍ നിന്ന് സുധാകരന് തന്നെ മത്സരിക്കണമെന്ന് എഐസിസി നേതൃത്വം നിലപാട് കടുപ്പിച്ചു.
സുധാകരന് മാത്രം ഇളവ് നല്‍കിയാല്‍ സംസ്ഥാനത്തെ മറ്റു ചില യുഡിഎഫ് എംപിമാരും ലോക്‌സഭാ തിരഞ്ഞെടുപ്പില്‍ നിന്ന് ഒഴിവാക്കണമെന്ന് ആവശ്യപ്പെടും. ഈ സാഹചര്യം കൂടി കണക്കിലെടുത്താണ് എഐസിസി നേതൃത്വത്തിന്റെ കടുംപിടിത്തം. അടുത്ത നിയമസഭാ തിരഞ്ഞെടുപ്പും മുഖ്യമന്ത്രി കസേരയും ലക്ഷ്യമിട്ടാണ് സുധാകരന് ലോക്‌സഭാ തിരഞ്ഞെടുപ്പ് രംഗത്തുനിന്ന് മാറിനില്‍ക്കാന്‍ ആഗ്രഹിക്കുന്നതെന്നും റിപ്പോര്‍ട്ടുകളുണ്ടായിരുന്നു.
