സുരേഷ് ഗോപിയും താനും തമ്മിലുള്ളത് വര്‍ഷങ്ങളായുള്ള ബന്ധമാണെന്നും ആളുകള്‍ അദ്ദേഹത്തെ തെറ്റിദ്ധരിപ്പിച്ചുവെന്നും കലാമണ്ഡലം ഗോപി. പത്മഭൂഷനു വേണ്ടി സുരേഷ് ഗോപിയെ അനുഗ്രഹിക്കണം എന്നു പറഞ്ഞ് ഒരു ഡോക്ടര്‍ വിളിച്ചിരുന്നു. ഇത് മകന് ഇഷ്ടപ്പെട്ടില്ല. അവര്‍ തമ്മില്‍ എന്തെക്കെയോ സംസാരിച്ചു. ഇതിന്റെ പരിഭവത്തിലാണ് മകന് ഫേസ്ബുക്കില്‍ പോസ്റ്റിട്ടത്. ഇത് ഞാന്‍ അറിഞ്ഞപ്പോള്‍ അവനോട് എന്തിനിങ്ങനെ എഴുതിയെന്ന് ചോദിച്ചു. ഉടന്‍ പോസ്റ്റ് നീക്കം ചെയ്തു. സുരേഷ് ഗോപിക്ക് ഇനിയും വരാം, എത്തിയാല്‍ സ്വീകരിക്കും. സുരേഷ് ഗോപിയും ഞാനും തമ്മില്‍ സ്‌നേഹ ബന്ധം ആണ്, അത് രാഷ്ട്രീയത്തിന് ഉപയോഗിക്കേണ്ടതില്ലെന്നും കലാമണ്ഡലം ഗോപി പറഞ്ഞു.
സുരേഷ് ഗോപി ഒരു കലാകാരനാണ്. അദ്ദേഹം രാഷ്ട്രീയക്കാരനായത് ഇപ്പോഴാണ്. അതിനും മുന്‍പേ ശക്തമായ ബന്ധമുണ്ട്. ഞാനും ഒരു കലാകാരനാണ്. കലാകാരന്മാര്‍ തമ്മിലുള്ള സ്നേഹത്തെ അളന്ന് വിലവെയ്ക്കാന്‍ കഴിയില്ല. സുരേഷ് ഗോപി, മോഹന്‍ലാല്‍, മമ്മൂട്ടി എന്നിവരൊക്കെയായി വലിയ അടുപ്പമുണ്ട്. സുരേഷ് ഗോപിയെ വിഷമിപ്പിക്കുന്ന ഒന്നും തന്റെ ഭാഗത്തു നിന്ന് ഉണ്ടാകില്ലെന്നും അദ്ദേഹം പറഞ്ഞു.
