ടി20യിൽ ഡബിൾ സെഞ്ച്വറിയോ!! ഈ താരങ്ങൾക്ക് അതിന് സാധിക്കുമെന്ന് യുവരാജ്

അഭിറാം മനോഹർ

ചൊവ്വ, 11 ഫെബ്രുവരി 2020 (12:18 IST)
ടി20 ക്രിക്കറ്റിൽ ഡബിൾ സെഞ്ച്വറി നേട്ടമെന്നത് ബാറ്റ്സ്മാന്മാരുടെ വന്യമായ സ്വപ്നമാണ്. ഏറെ കാലമായി ഏകദിന ക്രിക്കറ്റിലും ഒരു ഡബിൾ സെഞ്ച്വറി പിറക്കുക എന്നത് പ്രയാസകരമായ വസ്തുത ആയിരുന്നെങ്കിൽ ഇന്നത് മാറിയിരിക്കുന്നു. അതുപോലെ തന്നെ ടി20 ക്രിക്കറ്റിലും ഡബിൾ സെഞ്ച്വറി എന്നത് അപ്രാപ്യമായ നേട്ടമല്ല. ഇന്നിങ്സിന്റെ ആദ്യ പന്ത് മുതൽ അവസാനം വരെ നിൽക്കാൻ സാധിച്ചാൽ ഡബിള്‍ സെഞ്ച്വറി നേടുകയെന്നത് സാധ്യമാണ്.
 
ഇപ്പോളിതാ അധികം വൈകാതെ തന്നെ ടി20യില്‍ ഡബിള്‍ സെഞ്ച്വറി പിറക്കുന്നതിന് ക്രിക്കറ്റ് ലോകം സാക്ഷിയാവുമെന്നു പ്രവചിച്ചിരിക്കുകയാണ് ഇന്ത്യയുടെ മുന്‍ താരമായ യുവരാജ് സിങ്. ക്രിക്കറ്റ് ലോകത്തിലെ മൂന്ന് താരങ്ങൾക്ക് ഈ നേട്ടം സ്വന്തമാക്കാൻ കഴിയുമെന്നാണ് യുവി പറയുന്നത്.ഇന്ത്യയുടെ വെടിക്കെട്ട് ഓപ്പണറും വൈസ് ക്യാപ്റ്റനുമായ രോഹിത് ശര്‍മ, ദക്ഷിണാഫ്രിക്കയുടെ മുന്‍ സൂപ്പര്‍ താരം എ ബി ഡിവില്ലിയേഴ്‌സ്, വെസ്റ്റ് ഇന്‍ഡീസിന്റെ ഇതിഹാസ ഓപ്പണര്‍ ക്രിസ് ഗെയ്ല്‍ എന്നിവരാണ് യുവിയുടെ അഭിപ്രായത്തിൽ ഈ നേട്ടത്തിലെത്താൻ സാധ്യതയുള്ള മൂന്ന് പേർ.
 
ഈ മൂന്നു പേരില്‍ രോഹിത് മാത്രമാണ് അന്താരാഷ്ട്ര ക്രിക്കറ്റില്‍ സജീവമായുള്ളത്. അന്താരാഷ്ട്ര ക്രിക്കറ്റില്‍ നിന്നും വിരമിച്ച എ ബി ഡി ഫ്രാഞ്ചൈസി ലീഗുകളിൽ സജീവമാണ്. ഗെയ്‌ൽ വിരമിച്ചിട്ടില്ലെങ്കിലും ഫ്രാഞ്ചൈസി ലീഗുകളില്‍ അദ്ദേഹം കളിക്കുന്നുണ്ട്. ടി20യില്‍ ഡബിള്‍ സെഞ്ച്വറിയെന്നത് ഒരിക്കലും എളുപ്പമല്ല. എന്നാല്‍ അത് ഒരിക്കലും സാധിക്കാത്ത കാര്യമാണെന്ന് കരുതുനില്ലെന്ന് യുവി പറഞ്ഞു. ക്രിക്കറ്റ് മാറികൊണ്ടിരിക്കുകയാണ് അതിനാൽ നല്ലത് തന്നെ നമുക്ക് പ്രതീക്ഷിക്കാം.അന്താരാഷ്ട്ര ക്രിക്കറ്റില്‍ ഇല്ലെങ്കിലും ഗെയ്‌ലും ഡിവില്ലിയേഴ്‌സും ഇപ്പോഴും ഫ്രാഞ്ചൈസി ക്രിക്കറ്റിലെ സജീവ സാന്നിധ്യങ്ങളാണെന്നും യുവി ഓർമിപ്പിച്ചു.

വെബ്ദുനിയ വായിക്കുക

അനുബന്ധ വാര്‍ത്തകള്‍