ഒളിമ്പിക്സ് സ്പ്രിന്‍റ് ചാമ്പ്യന്‍ ഉസൈന്‍ ബോള്‍ട്ട് സ്പാനിഷ് ഫുട്ബോള്‍ ക്ലബായ റയല്‍ മാഡ്രിഡിനൊപ്പം പരിശീലനം നടത്തും. ഫുട്ബോള്‍ ടീമിനൊപ്പം പരിശീലനം നടത്താന്‍ തീരുമാനിച്ച വിവരം ബോള്‍ട്ട് തന്നെയാണ് കഴിഞ്ഞ ദിവസം വെളിപ്പെടുത്തിയത്.
ഒളിമ്പിക്സില്‍ 100 മീറ്ററില്‍ 200 മീറ്ററിലും ലോക റിക്കോഡോഡെ സ്വര്‍ണ്ണം നേടിയ ബോള്‍ട്ട് 4x100 മീറ്റര്‍ റിലയിലെ ജമൈക്കന്‍ ടീമിന്‍റെ വിജയക്കുതിപ്പിലും പങ്കാളിയായി. റയല്‍ മാഡ്രിലെ മുന്‍ മാഞ്ചെസ്റ്റര്‍ യുണൈറ്റഡ് താരം വാന്‍ നിസ്റ്റെല്‍ റൂയിയെ കാണാന്‍ താന്‍ കാത്തിരിക്കുകയാണെന്നും ബോള്‍ട്ട് പറഞ്ഞു.
റൌളും വാന്‍ നിസ്റ്റെല്‍ റൂയിയും ഏറ്റവും മികച്ച ഗോളടിക്കാരാണെന്നാണ് തന്‍റെ വിലയിരുത്തലെന്ന് പറഞ്ഞ ബോള്‍ട്ട് റൂയി മാഞ്ചെസ്റ്ററില്‍ ഉണ്ടായിരുന്നപ്പോള്‍ മുതല്‍ താന്‍ അദ്ദേഹത്തിന്‍റെ കളി കാണുന്നുണ്ടെന്നും മഹാനായ ആ കളിക്കാരനെ കാണാന്‍ താന്‍ കാത്തിരിക്കുകയാണെന്നും ലോകത്തിലെ ഏറ്റവും വേഗമേറിയ അത്‌ലറ്റ് പറയുന്നു.
