ജസ്റ്റിന്‍ബീബര്‍ സംഭവമല്ല. സമയം വെറുതേ കളഞ്ഞുവെന്ന് സോണാലി. ഇന്ത്യന്‍ ആരാധകരുടെ ദീര്‍ഘനാളത്തെ കാത്തിരിപ്പാണ് ഇന്നലെ ഡിവൈ പാട്ടീല്‍ സ്‌റ്റേഡിയത്തില്‍ നടന്നത്. പോപ് സംഗീത ലോകത്ത് തരംഗമായി മാറിയ ജസ്റ്റിൻ ബീബർ സംഗീതം അവതരപ്പിക്കാനായി ഇന്ത്യയിൽ എത്തിയിരുന്നു.
മുംബൈയിലെ ഡിവൈ പാട്ടീൽ ക്രിക്കറ്റ് മൈതാനത്ത് നടന്ന ജസ്റ്റിൻ ബീബറുടെ സംഗീത വിരുന്നില്‍ കാണികള്‍ക്കിടയില്‍ ആലിയാഭട്ട്, മലൈക്ക അറോറ, ജാക്വിലിന്‍ ഫെര്‍ണാണ്ടസ്, അര്‍ബാസ് ഖാന്‍, അര്‍ജുന്‍ ബില്ലാനി തുടങ്ങി ബോളിവുഡിലെയും ടെലിവിഷനിലെയും പ്രമുഖരും എത്തിയിരുന്നു. എന്നാല്‍ ആ വേദി വിട്ടവരില്‍ പലര്‍ക്കും പരിപാടി തൃപ്തിയായില്ല.
പരിപാടിക്കായി വെറുതേ സമയം കളഞ്ഞെന്നായിരുന്നു ട്വിറ്ററില്‍ മുന്‍ ബോളിവുഡ് നായിക സോണാലി ബാന്ദ്രെ കുറിച്ചത്. കുട്ടികളുമായി പരിപാടിക്ക് എത്തിയ സോണാലി നിരാശയോടെയാണ് താന്‍ ഡിവൈ പാട്ടീല്‍ സ്‌റ്റേഡിയം വിട്ടതെന്ന് പറഞ്ഞു. പരിപാടിയെയും സംഘാടനത്തെയും വിമര്‍ശിച്ച് സോണാലി മാത്രമല്ല എത്തിയിട്ടുള്ളത്. ബിപാഷാ ബസുവും നിരാശയോടെയാണ് മടങ്ങിയത്. ബിപാഷയും ഭര്‍ത്താവും പരിപാടി കണ്ടത് വെറും അഞ്ചു മിനിറ്റ് മാത്രമാണ്. ഇത്രയും വലിയ ജനക്കൂട്ടത്തിനിടയില്‍ മതിയായ സുരക്ഷിതത്വം കിട്ടില്ലെന്ന് പറഞ്ഞാണ് താര ദമ്പതികള്‍ മടങ്ങിയത്.