ട്രെയിനില്‍വച്ച് സമ്മതമില്ലാതെ ചുംബിച്ചതിന്റെ പേരില്‍ 37 കാരന് തടവുശിക്ഷ. ഏഴ് വര്‍ഷം മുന്‍പ് യുവതി നല്‍കിയ പരാതിയിലാണ് വിധി. ഗോവയില്‍ ഒരു ലോക്കല്‍ ട്രെയിനുള്ളില്‍വെച്ചാണ് സംഭവമെന്നാണ് റിപ്പോര്‍ട്ട്. തടവുശിക്ഷയ്‌ക്കൊപ്പം 10,000 രൂപ പിഴയും കോടതി ചുമത്തിയിട്ടുണ്ട്. ഇതില്‍ 5,000 രൂപ പരാതിക്കാരിക്ക് നഷ്ടപരിഹാരമായി നല്‍കണം.
തന്റെ പിന്നില്‍ നിന്നിരുന്ന യാത്രക്കാരന്‍ തള്ളിയപ്പോള്‍ മുന്‍പിലേക്ക് വീഴാന്‍ പോയതാണെന്നും അപ്പോള്‍ തന്റെ ചുണ്ട് യുവതിയുടെ കവിളില്‍ പോയി തട്ടിയതാണെന്നും കോടതിയില്‍ യുവാവ് വാദിച്ചു. എന്നാല്‍, ഇയാളുടെ വാദങ്ങളെ മെട്രോപ്പോളിറ്റന്‍ മജിസ്‌ട്രേറ്റ് വി.പി.കേദാര്‍ തള്ളി.
2015 ഓഗസ്റ്റ് 28 ന് തന്റെ സുഹൃത്തിനെ കാണാന്‍ ഗോവയിലേക്ക് പോകുന്നതിനിടെയാണ് സംഭവമെന്ന് പരാതിക്കാരി കോടതിയില്‍ അറിയിച്ചു. മസ്ജിദ് സ്റ്റേഷനില്‍വെച്ച് ഒരാള്‍ കംപാര്‍ട്‌മെന്റിലേക്ക് കയറിവന്നു. തന്റെ എതിര്‍വശത്തെ സീറ്റില്‍ ഇരുന്നു. തീവണ്ടി സിഎസ്എംടി സ്റ്റേഷനില്‍ എത്തുന്നതിനു തൊട്ടുമുന്‍പ് ഇയാള്‍ തന്റെ വലത് കവിളില്‍ ചുംബിക്കുകയായിരുന്നെന്നും പരാതിക്കാരി വിവരിച്ചു.