രാജ്യത്തിനകത്തെ കള്ളപ്പണത്തിന്റെ ഒഴുക്കു തടയുക എന്ന ഉദ്ദേശത്തോടെ എല്ലാവര്‍ക്കും പാന്‍( പെര്‍മനന്റ് അക്കൌണ്ട് നമ്പര്‍) നിര്‍ബന്ധമാക്കാന്‍ കേന്ദ്രസര്‍ക്കാര്‍ ഒരുക്കം തുടങ്ങുന്നു. കൂടുതല്‍ സാമ്പത്തിക വിനിമയങ്ങളെ നികുതി വലയ്ക്കുള്ളിലാക്കാന്‍ പിന്നാലെ നീക്കമുണ്ടാവുകയും ചെയ്യും. എല്ലാ പണമിടപാടുകളും നികുതിവലയുടെ കീഴില്‍ കൊണ്ടുവരുകയാണ് ഈ നീക്കത്തിനു പിന്നില്‍.
കേന്ദ്ര പ്രത്യക്ഷനികുതിവകുപ്പ് ഇതിനുള്ള പദ്ധതികള്‍ ആവിഷ്‌കരിച്ചുവരികയാണ്. യുടിഐ. ഇന്‍ഫ്രാസ്ട്രക്ചര്‍ ടെക്‌നോളജീസ് ആന്‍ഡ് സര്‍വീസസ് ലിമിറ്റഡ്, നാഷണല്‍ സെക്യൂരിറ്റീസ് ആന്‍ഡ് ഡെപ്പോസിറ്ററി ലിമിറ്റഡ് എന്നിവയെ ദേശീയാടിസ്ഥാനത്തില്‍ പാന്‍ കാര്‍ഡ് വിതരണ ചുമതല ഇതിനകം ഏല്‍പ്പിച്ചുകഴിഞ്ഞു. ധനമന്ത്രി അരുണ്‍ ജെയ്റ്റ്‌ലിയുടെ ബജറ്റ് നിര്‍ദേശത്തിന്റെ ചുവടുപിടിച്ചാണ് രാജ്യവ്യാപകമായി പാന്‍ കാര്‍ഡ് നിര്‍ബന്ധമാക്കുന്നത്.
നിലവില്‍ പല ബാങ്ക് ഇടപാടുകള്‍ക്കും പാന്‍ കാര്‍ഡ് നിര്‍ബന്ധമാണ്. എന്നാല്‍, കൂടുതല്‍ പണമിടപാടുകളും പാന്‍കാര്‍ഡില്ലാതെയാണു നടക്കുന്നത്. ഈ വര്‍ഷം മാര്‍ച്ച് 31 വരെയുള്ള കണക്കനുസരിച്ച് രാജ്യത്ത് ആകെ 22.3 കോടി പാന്‍ കാര്‍ഡുകളാണുള്ളത്. പാന്‍ കാര്‍ഡ് ഉടമകളുടെ 16 ശതമാനം മാത്രമാണ് ഇപ്പോള്‍ ആദായനികുതി റിട്ടേണ്‍ ഫയല്‍ ചെയ്യുന്നത്.
ഭൂരിഭാഗം കാര്‍ഡുടമകളും ആദായനികുതി ഒഴിവ് പരിധിയായ(സ്റ്റാന്റേര്‍ഡ് ഡിഡക്ഷന്‍) 2.5 ലക്ഷം രൂപയില്‍ താഴെ വാര്‍ഷികവരുമാനമുള്ളവരാണ്. രാജ്യത്തെ ആകെ ജനസംഖ്യയുടെ 18 ശതമാനം കാര്‍ഡുകളാണ് ഇതിനകം നല്‍കിയിട്ടുള്ളത്.