അടുത്തിടെയാണ് സോഷ്യല്‍മീഡിയയില്‍ ചില ചിത്രങ്ങളും വീഡിയോകളും വൈറലായത്. പത്തു വയസിനടുത്ത് പ്രായം വരുന്ന ഒരു ഭിക്ഷാടകനായ ബാലന്റെ കയ്യില്‍ കിടന്നുറങ്ങുന്ന അര്‍ദ്ധനഗ്‌നയായ ബാലികയുടെ വീഡിയോയും ചിത്രങ്ങളുമായിരുന്നു അത്. ഈ കുട്ടികൾക്ക് പിന്നിൽ ഭിക്ഷാടന മാഫിയയാണെന്ന് സംശയം തോന്നിയ ഡൽഹി സ്വദേശിനിയായ ദീപ മനോജ് എന്ന സാമൂഹ്യപ്രവർത്തകയാണ് ആ ചിത്രങ്ങളും വീഡിയോകളും തന്റെ ഫേസ്ബുക്കിലൂടെ പങ്കുവച്ചത്.
ചിത്രങ്ങളും മറ്റും പോസ്റ്റ് ചെയ്ത് മണിക്കുറുകള്‍ക്കകം തന്നെ അവ വൈറലാകുകയും ചെയ്തിരുന്നു. ഒരു രാത്രി ഇരുട്ടി വെളുത്തപ്പോഴേയ്ക്കും 15 ലക്ഷത്തിലധികം ആളുകള്‍ ഈ വീഡിയോ കണ്ടു കഴിഞ്ഞിരുന്നു. അത്രയും തന്നെ ആളുകള്‍ അവ ഷെയര്‍ ചെയ്യുകയും ചെയ്തിരുന്നു. എന്നാല്‍ തൊട്ടടുത്ത ദിവസം തന്നെ ആ പോസ്റ്റ് ഫേസ്ബുക്കിൽ നിന്നും അപ്രത്യക്ഷമാകുകയും ചെയ്തു. എന്നാല്‍ ഇപ്പോള്‍ ഇതാ ആ കുട്ടി ആരാണെന്ന് കണ്ടെത്തിയെന്നും ഇനി അവൾ ഭിക്ഷയാചിക്കാൻ തെരുവിൽ വരില്ലെന്നും പറഞ്ഞ് ദീപ തന്റെ ഫേസ്‌ബുക്കില്‍ പുതിയ പോസ്റ്റ് ഇട്ടിരിക്കുന്നു.