കൊച്ചിയില്‍ യുവനടി ആക്രമിക്കപ്പെട്ട സംഭവത്തില്‍ അറസ്റ്റിലായ നടന്‍ ദിലീപിന് വേണ്ടി പലരും രംഗത്തെത്തുകയും അത് വാര്‍ത്തയാകുകയും ചെയ്തിരുന്നു. അതിനിടയിലാണ് പള്ളിയില്‍ വെച്ച് ഫാ ആന്‍ഡ്രൂസ് പുത്തന്‍പറമ്പില്‍ ദിലീപിന് വേണ്ടി പ്രസംഗിച്ചെന്ന ആരോപണമുയര്‍ന്നത്.
എന്നാല്‍ നടന്‍ ദിലീപിന് വേണ്ടി പള്ളിയില്‍ പ്രസംഗിച്ചെന്ന ആരോപണത്തില്‍ വിശദീകരണവുമായി ഫാ ആന്‍ഡ്രൂസ് രംഗത്തുവന്നിരിക്കുകയാണ്. പള്ളിയില്‍ നടന്ന പ്രാര്‍ത്ഥനയില്‍ ഒരാളുടെയും പേരെടുത്ത് പരാമര്‍ശിച്ചിട്ടില്ലെന്നും ക്രിക്കറ്റ് താരം ശ്രീശാന്ത്, നടി മോഹിനി തുടങ്ങിയവരുടെ കാര്യം പറഞ്ഞിനിടെയാണ് ദിലീപിനെ കുറിച്ച് പറഞ്ഞതെന്നും ഫാ ആന്‍ഡ്രൂസ് പറഞ്ഞു.
ദിലീപ് ജയിലില്‍ ബൈബിള്‍ വായിച്ചിരിക്കുകയാണെന്ന് വാര്‍ത്ത വന്നിരുന്നു ഈയിടെ വന്നിരുന്നു. ഇവര്‍ വിശ്വാസത്തിലേക്ക് തിരിഞ്ഞത് പോലെ എല്ലാവരും വിശ്വാസം മുറുകെ പിടിക്കണം എന്ന് സൂചിപ്പിക്കാനായിരുന്നു ഇതെന്നും ആന്‍ഡ്രൂസ് പറയുന്നു. ദിലീപ് കുറ്റം ചെയ്‌തെങ്കില്‍ ശിക്ഷിക്കപ്പെടണം. അദ്ദേഹത്തിന് വേണ്ടി പ്രാര്‍ത്ഥിക്കണമെന്നൊന്നും പറഞ്ഞിട്ടില്ല. ഇനി അഥവാ പ്രാര്‍ത്ഥിക്കാന്‍ ആവശ്യപ്പെട്ടെങ്കില്‍ തന്നെ എന്താണ് തെറ്റെന്നും അദ്ദേഹം ചോദിച്ചു.