പ്രമുഖനടിയെ ആക്രമിച്ച കേസില്‍ റിമാന്‍ഡില്‍ കഴിയുന്ന മുഖ്യപ്രതി സുനിക്കെതിരെ പുതിയ കേസ്. 2011-ല്‍ മറ്റൊരു നടിയെ തട്ടിക്കൊണ്ടുപോകാന്‍ ശ്രമിച്ചതിനാണ് എറണാകുളം സെന്‍ട്രല്‍ പോലീസ് കേസ് രജിസ്റ്റര്‍ ചെയ്തിരിക്കുന്നത്. നിര്‍മാതാവ് ജോണി സാഗരികയുടെ മൊഴിയുടെ അടിസ്ഥാനത്തിലാണു സെന്‍ട്രല്‍ പൊലീസ് ഇന്നലെ വൈകിട്ട് കേസ് റജിസ്റ്റര്‍ ചെയ്തതെന്ന് അസി. കമ്മിഷണര്‍ കെ. ലാല്‍ജി പറഞ്ഞു.
മലയാള സിനിമയിലെ യുവസംവിധായകന്റെ ഭാര്യയായ നടിക്കുവേണ്ടിയായിരുന്നു സുനിലും സംഘവും കെണി ഒരുക്കിയത്. എന്നാല്‍, ഈ കെണിയില്‍ അകപ്പെട്ടത് നിര്‍മാതാവിന്റെ ഭാര്യയായിരുന്നു. 2011 നവംബറിലാണ് കേസിനാസ്പദമായ സംഭവം നടക്കുന്നത്. ജോണി സാഗരികയുടെ ഡ്രൈവറായിരുന്നു സുനില്‍കുമാര്‍.
ജോണി സാഗരികയുടെ പുതിയ സിനിമയില്‍ അഭിനയിക്കുന്നതിനായി യുവനടിയും നിര്‍മാതാവിന്റെ ഭാര്യയായ നടിയും കൊച്ചിയിലേക്കു വരുന്നതറിഞ്ഞ പള്‍സര്‍ തട്ടിക്കൊണ്ട് പോകാന്‍ പ്ലാന്‍ ഇടുകയായിരുന്നു. റെയില്‍‌വേ സ്റ്റേഷനില്‍ നിന്നും യുവനടിയെ തട്ടിക്കൊണ്ടുപോകാനാണ് ലക്ഷ്യമിട്ടിരുന്നത്. എന്നാല്‍, ആളുമാറി മറ്റൊരു നടിയെയാണ് തട്ടിക്കൊണ്ടുപോയത്. വാഹനം റൂട്ട് മാറി സഞ്ചരിച്ചതോടെ നിര്‍മാതാവിനെയും ഭര്‍ത്താവിനെയും നടി ഫോണില്‍ വിളിച്ച് വിവരമറിയിച്ചു. അങ്ങനെയായിരുന്നു അവര്‍ രക്ഷപെട്ടത്.
തട്ടിക്കൊണ്ടുപോകല്‍, ഗൂഢാലോചന എന്നീ കുറ്റങ്ങളാണ് ചുമത്തിയിരിക്കുന്നത്. സുനിയെ കസ്റ്റഡിയില്‍ വാങ്ങി മൊഴിയെടുക്കാനുള്ള നടപടികള്‍ സ്വീകരിക്കുമെന്നും പോലീസ് പറഞ്ഞു.