ബുദ്ധിജീവികളെയും കോമേഷ്യല്‍ ആരാധകരെയും ഒരു പോലെ രസിപ്പിക്കുന്ന ചിത്രങ്ങള്‍ ഒരുക്കുന്നതിലാണ് ധനുഷിന്‍റെ മൂത്ത സഹോദരന്‍ ശെല്‍‌വ രാഘവന്‍റെ ഭ്രമം. അതുകൊണ്ടാകാം ശെല്‍‌വയുടെ സഹായിയായി ദീര്‍ഘകാലം പ്രവര്‍ത്തിച്ചിരുന്ന മിത്രന്‍ ജവഹറിനും ആദ്യ ചിത്രത്തിനായി ശെ‌‌ല്‍‌‌വരാഘവനെ ആശ്രയിക്കേണ്ടിവന്നത്.
തെലുങ്കില്‍ വിജയം നേടിയ ‘അഡവാരി മാറ്റലക്ക് അര്‍തലു വെരലു’ തമിഴില്‍ എത്തിയപ്പോള്‍ യാരെടി മോഹിനിയായി. ത്രിഷയെയും വെങ്കിടേഷിനെയും നായികാ നായകന്‍‌മാരാക്കി ശെല്‍‌വരാഘവന്‍ ചെയ്ത ചിത്രം തമിഴിലേക്ക് രൂപം മാറിയപ്പോല്‍ നയന്‍ താരയും ധനുഷും നായികാ നായകന്‍മാരായി. സെന്‍റിമെന്‍‌സും ആക്ഷനും ഗ്ലാമറും കുടുംബ കഥയും ഒക്കെ കൂടി ഒരു സാധാരണ തമിഴ് ചിത്രത്തിനപ്പുറത്തേക്കുള്ള കൌതുകങ്ങളൊന്നും ചിത്രം നല്‍കുന്നില്ല.
മതിയായ യോഗ്യതയുണ്ടെങ്കിലും അഞ്ച് വര്‍ഷമായി യാതൊരു തൊഴിലും ഇല്ലാ‍ത്ത വാസു (ധനുഷ്) പിതാവിന്‍റെ വരുമാനത്തിലാണ് കഴിയുന്നത്. സാഹചര്യം കൂടുതല്‍ ദരിദ്രമാകുന്നത് ഒരു തൊഴില്‍ നേടണമെന്ന അയാള്‍ക്ക് മേലുള്ള സമ്മര്‍ദ്ദം കൂട്ടുന്നു. അച്ഛന്‍റെ (രഘുവരന്‍) കടുത്ത സമ്മര്‍ദ്ദത്തെ തുടര്‍ന്ന് യുവത്വത്തിന്‍റെ കളിചിരികള്‍ വിട്ട് വാസു തൊഴില്‍ തേടല്‍ ആരംഭിക്കുന്നു. ഇതിനിടയിലാണ് കീര്‍ത്തിയെ (നയന്‍ താര) അയാള്‍ കാണുന്നത്.
ആദ്യ കാഴ്ചയില്‍ തന്നെ അവളെ പ്രണയിച്ചു പോയ വാസുവിന് അവളുടെ കമ്പനിയില്‍ തന്നെ ജോലി നേടണമെന്ന് സ്വപ്‌നവും ഉടന്‍ തന്നെ സഫലമാകുകയാണ്. അവിടെ നടക്കുന്ന ഒരു വാക് ഇന്‍ ഇന്‍റര്‍വ്യൂവിലൂടെ തെരഞ്ഞെടുക്കപ്പെടുന്ന വാസു കീര്‍ത്തിയുടെ കമ്പനിയില്‍ തന്നെ എത്തി. കീര്‍ത്തിയുടെ സഹായത്തോടെ തന്നെ തൊഴിലെല്ലാം പഠിച്ചെടുക്കുന്ന വാസുവിനെ ഡെപ്യൂട്ടേഷന്‍ ജോലിക്കായി കമ്പനി കീര്‍ത്തിക്കൊപ്പം ഓസ്ട്രേലിയയിലേക്ക് അയയ്‌ക്കുകയാണ്.
ഓസ്ട്രേലിയയില്‍ താമസിക്കുന്നതിനിടയില്‍ തന്‍റെ പ്രണയം വാസു കീര്‍ത്തിയെ അറിയിക്കുന്നു. എന്നാല്‍ തന്‍റെ വിവാഹം തീരുമാനിച്ചിരിക്കുകയാണെന്നും അടുത്ത മാസം തന്നെ ഉണ്ടെന്നുമുള്ള കീര്‍ത്തിയുടെ വെളിപ്പെടുത്തല്‍ വാസുവിനെ തകര്‍ത്ത് കളഞ്ഞു. മകന്‍റെ തകര്‍ന്ന മാനസിക നില കണ്ടറിയുന്ന പിതാവ് കീര്‍ത്തിയോട് സംസാരിച്ച് മനസ്സ് മാറ്റാന്‍ ഒരു ശ്രമം നടത്തി. എന്നാല്‍ വാസുവിന്‍റെ പിതാവിനെ പരിഹാസിക്കാനും അപമാനിക്കാനും കീര്‍ത്തി മടിച്ചില്ല.
PRO
PRO
ഈവേദനയില്‍ പിതാവ് മരിക്കുന്നു. ഇതോടെ പൂര്‍ണ്ണമായും തകര്‍ന്ന് പോകുന്ന വാസുവിന് ആശ്വാസം നല്‍കുന്നത് സുഹൃത്ത് കാര്‍ത്തിക്കാണ്. വിവാഹ ഒരുക്കങ്ങള്‍ നടക്കുന്ന സ്വന്തം വീട്ടിലേക്ക് കാര്‍ത്തിക് വാസുവിനെ കൊണ്ടു പോകുകയാണ്. എന്നാല്‍ വിവാഹവുമായി ബന്ധപ്പെട്ട് കൂടുതല്‍ കാര്യങ്ങള്‍ അറിയുമ്പോഴാണ് വാസുവിന് മനസ്സിലാകുന്നത് കാര്‍ത്തിക് വിവാഹം ചെയ്യുന്നത് മറ്റാരെയുമല്ല. അവന്‍റെ കസിനായ കീര്‍ത്തിയെ തന്നെയാണെന്ന്.
സത്യന്‍ അന്തിക്കാടിന്‍റെ മനസ്സിനക്കരെ മുതല്‍ മികച്ച അഭിനേത്രിയാണെന്ന് തെളിയിച്ചെങ്കിലും ഗ്ലാമറിന്‍റെ പേരില്‍ തമിഴിലും തെലുങ്കിലും തകര്‍ക്കുന്ന നയന്‍ താരയ്‌ക്ക് അഭിനയിക്കാനുള്ള അവസരം ഈ ചിത്രത്തിലൂടെ ലഭിക്കുന്നുണ്ട്. അതേ സമയം മികച്ച ആക്ഷന്‍ രംഗങ്ങളിലും നൃത്തരംഗങ്ങളിലും തിളങ്ങുന്ന ധനുഷിന് അതിനുള്ള കാര്യമായ സ്കോപ് ചിത്രം നല്‍കുന്നില്ല. പകരം വ്യത്യസ്തത അഭിനയിപ്പിച്ച് ഫലിപ്പിക്കാനുള്ള ധനുഷിന്‍റെ ആഗ്രഹത്തെ ചിത്രം സഫലീകരിക്കുന്നു.
മികച്ച അഭിനയത്തിന്‍റെ നനുത്ത ഓര്‍മ്മകള്‍ നല്‍കി കടന്നുപോയ രഘുവരന്‍റെ അവസാന കാലത്തെ മികച്ച വേഷത്തിലൊന്നാണ് ചിത്രത്തിലേത്. ഭാവങ്ങള്‍ക്ക് തീവ്രത നല്‍കുന്ന രഘുവരന്‍റെ ഡയലോഗ് പ്രസന്‍റേഷന്‍ മനോഹരമാണ്. കാര്‍ത്തിക്കും കരുണാസും കഥാപാത്രത്തിന്‍റെ ഗൌരവം ഉള്‍ക്കൊള്ളുന്നുണ്ട്. ചിത്രത്തില്‍ കോമഡിക്കായി പ്രത്യേകം തയ്യാറാക്കിയ രംഗങ്ങള്‍ ഇല്ലെങ്കിലും സിറ്റുവേഷന്‍ കോമഡികള്‍ ഫലപ്രദമായി വിനിയോഗിച്ചിരിക്കുന്നു
എന്നാല്‍ ക്ലൈമാക്‍സിന് ഒരു ഇഴച്ചില്‍ അനുഭവപ്പെടുന്നു. ശെല്‍‌വരാഘവന്‍ ചിത്രങ്ങളില്‍ മുമ്പ് ഉപയോഗിച്ചിരിക്കുന്നതു സമാനമായ സംഗീതമാണ് യുവാന്‍ ശങ്കര്‍രാജ ഒരുക്കിയിരിക്കുന്നതെങ്കിലും മനോഹരമാണ്. പ്രത്യേകിച്ച് പുതുമയൊന്നും ചിത്രത്തിനില്ലെങ്കിലും ചെറിയ ഒരു കഥയെ മികച്ച രീതിയില്‍ അവതരിപ്പിക്കാന്‍ മിത്രന്‍ ജവഹറിനു കഴിഞ്ഞിരിക്കുന്നു.