കേരളത്തില്‍ സിപിഎം ഭരണം അതിഗംഭീരമെന്ന്‌ അടുത്തിടെ പാര്‍ട്ടി സ്വയം വിലയിരുത്തി. ഏക പ്രശ്‌നം ഭരണനേട്ടങ്ങള്‍ ജനങ്ങളില്‍ എത്തിക്കുന്നതില്‍ വീഴ്‌ച പറ്റി എന്നതാണ്.
വി എസ് അച്യുതാനന്ദന്‍ മുഖ്യമന്ത്രിയായിട്ടും ഗതികേട്‌ മാറുന്നില്ലല്ലോ എന്ന്‌ പരിതപിക്കുന്ന ജനങ്ങള്‍ ആശ്വസിച്ചോളു സത്യത്തില്‍ ഭരണം ഗംഭീരമാണ്‌, നിങ്ങള്‍ അത്‌ അറിയുന്നില്ല എന്നേയുള്ളു.
രാജ്യത്തിന്‍റെ സമസ്ത രംഗത്തും മുല്യശോഷണം ഏറി വരുന്നു എന്നാണ്‌ എല്ലാവരുടേയും പരാതി പക്ഷേ. സി പി എം നേരിടുന്ന പ്രശ്‌നം അതല്ല. പാര്‍ട്ടിയല്‍ ‘പാര്‍ട്ടിപ്രവര്‍ത്തകര്‍’ ഏറി വരുന്നു എന്ന വിപരീത സമസ്യയാണ്‌ സിപിഎം ഇപ്പോള്‍ നേരിടുന്നത്‌. അല്ലെങ്കില്‍ എന്തിനാണ്‌ സിപിഎമ്മുകാര്‍ക്കിടയില്‍ കമ്മ്യൂണിസ്റ്റ്‌ കാമ്പയില്‍ കമ്മിറ്റി രൂപപ്പെടുന്നത്.
കമ്മ്യൂണിസ്റ്റ്‌ ആശയങ്ങളില്‍ നിന്ന്‌ പാര്‍ട്ടി എങ്ങാനും വ്യതിചലിച്ചാല്‍ ചൂണ്ടികാണിക്കാനും കമ്മ്യൂണിസ്റ്റ്‌ ആശയങ്ങള്‍ പ്രചരിപ്പിക്കാനും പാര്‍ട്ടിപരിപാടികള്‍ വിജയിപ്പിക്കാനുമാണ്‌ കേരളത്തില്‍ അങ്ങോളമിങ്ങോളം പാര്‍ട്ടിക്ക്‌ തലവേദനയായി ‘പാര്‍ട്ടിയേക്കാള്‍ വലിയ’ പാര്‍ട്ടികമ്മറ്റികള്‍ രൂപം കൊള്ളുന്നത്‌.
കോട്ടയം സമ്മേളനത്തോടെ പാര്‍ട്ടിക്കുള്ളിലെ എല്ലാ വിഭാഗീയതയും പാര്‍ട്ടി സെക്രട്ടറി ‘അവസാനിപ്പിച്ചതോടെയാണ്‌’ പാര്‍ട്ടിക്കുള്ളില്‍ പുതിയ പ്രതിഭാസം രൂപപ്പെടുന്നത്. വിപരീത ശബ്ദമുയര്‍ത്തിയവര്‍ ‘വിഭാഗീയതക്കാരായി’ നേരത്തെ ചിത്രീകരിക്കപ്പെട്ടെങ്കില്‍ അവരിപ്പോള്‍ സിപിഎം വിമതരായി പാര്‍ട്ടിക്ക്‌ പുറത്തേക്ക്‌ പോകുന്നു. പുറത്ത്‌ പോയാല്‍ അവര്‍ യു ഡി എഫ്‌ ചേരിയില്‍ പോയി തുലഞ്ഞോളും എന്ന്‌ പ്രതീക്ഷിച്ചവര്‍ക്കാണ്‌ തിരിച്ചടി ഉണ്ടായിരിക്കുന്നത്‌.
ഔദ്യോഗികമായി പാര്‍ട്ടിക്ക്‌ പുറത്തായവര്‍ പഴയതിനേക്കാള്‍ വര്‍ദ്ധിത വീര്യത്തോടെ പാര്‍ട്ടിയെ ‘സ്‌നേഹിച്ചുകൊണ്ട്‌’ കമ്മ്യൂണിസ്റ്റ്‌ കാമ്പയിന്‍ കമ്മറ്റിയില്‍ ചേരുന്നതാണ്‌ പുതിയ പ്രതിഭാസം.
PRO
PRO
കൂടുതല്‍ ആവേശത്തോടെ അവര്‍ പാര്‍ട്ടിക്ക്‌ വേണ്ടി മുദ്രാവാക്യം വിളിക്കുകയും പാര്‍ട്ടിക്കുള്ളിലെ വലതു പക്ഷക്കാരെ കൂടുതല്‍ ശക്തമായി തെറി വിളിക്കുകയും ചെയ്യുന്നു. ഏറാമലയിലും ഷോര്‍ണ്ണൂരിലും നാട്ടികയിലും ഈ പ്രതിഭാസം പ്രത്യക്ഷത്തില്‍ കണ്ടു. കേരളത്തില്‍ അങ്ങോളമിങ്ങോളം പാര്‍ട്ടി ശരീരത്തില്‍ ഈ പ്രതിഭാസം നിശബ്ദമായി പ്രത്യക്ഷപ്പെട്ടു തുടങ്ങി.
സിപിഎമ്മില്‍ നില്‍ക്കാന്‍ പറ്റാതെ വന്നാലും കമ്മ്യൂണിസ്റ്റ്‌കാരായി ജീവിക്കാനും പ്രവര്‍ത്തിക്കാനും പറ്റുമെന്ന്‌ തൃശൂര്‍ നാട്ടികയില്‍ സി പി എം വിമതര്‍ തെളിയിച്ചിട്ടുള്ളതാണ്‌. കമ്മ്യൂണിസ്റ്റ്‌ പാര്‍ട്ടി (മാര്‍ക്‌സിസ്റ്റ്‌) എന്ന പ്രാദേശിക പാര്‍ട്ടിയാണ്‌ തളിക്കുളം പഞ്ചായത്ത്‌ വര്‍ഷങ്ങളായി ഭരിക്കുന്നത്‌.
കമ്മ്യൂണിസ്റ്റ്‌ പാര്‍ട്ടിയുടെ ഐതിഹാസിക സമരചരിത്ര പാരമ്പര്യമുള്ള ഏറാമലയില്‍ സി പി എം ഔദ്യോഗിക പക്ഷത്തിന്‍റെ നിലപാടില്‍ പ്രതിഷേധിച്ച്‌ അയ്യായിരത്തിലേറെ പേരാണ്‌ രംഗത്ത്‌ എത്തിയത്‌. സിപിഎം പഞ്ചായത്ത്‌ പ്രസിഡന്‍റ് സ്ഥാനം വിട്ടുകൊടുക്കണമെന്ന പാര്‍ട്ടി തീരുമാനത്തെ പാര്‍ട്ടി അണികള്‍ പരസ്യമായി ചോദ്യം ചെയ്‌തു. ‘പാര്‍ട്ടികൂറ്‌’ പ്രഖ്യാപിച്ചുകൊണ്ട്‌ തന്നെ അവര്‍ അതിനായി പാര്‍ട്ടിക്ക്‌ പുറത്തു വന്നു.
സിപിഎം അംഗീകരിക്കില്ലെങ്കിലും ഷോര്‍ണ്ണൂരിലെ ഏറ്റവും വലിയ കമ്മ്യൂണിസ്‌റ്റ്‌കാരന്‍ ഇപ്പോള്‍ എം ആര്‍ മുരളിയാണ്‌. മുന്‍സിപ്പല്‍ വൈസ്‌ ചെയര്‍മാനായ മുരളിയെ പാര്‍ട്ടി പുറത്താക്കിയതിനെ തുടര്‍ന്ന്‌ കൗണ്‍സിലര്‍മാരടക്കം ആയിരക്കണക്കിന്‌ പ്രവര്‍ത്തകര്‍ പാര്‍ട്ടിക്ക്‌ പുറത്തു വന്നു.
പാര്‍ട്ടി വിട്ട ‘പാര്‍ട്ടി സ്‌നേഹികളുടെ കൂട്ടായ്‌മ’ സംസ്ഥാന തലത്തില്‍ വളരുകയാണ്‌. അധികാരത്തിന്‌ പുറത്ത്‌ നിന്ന്‌ പാര്‍ട്ടിയെ ചോദ്യം ചെയ്യുന്ന ഈ മുന്‍ സഖാക്കളുടെ ചോദ്യശരങ്ങള്‍ നേരിടാന്‍ പ്രാദേശിക സി പി എം സ്ഥാപനങ്ങള്‍ വീര്‍പ്പുമുട്ടുന്നു.
കേരളത്തിന്‍റെ ഭരണമല്ല, ഏറാമലകള്‍ ആവര്‍ത്തിക്കുന്നത് തടയലാണ് സി പി എമ്മിന്‍റെ ഇപ്പോഴത്തെ മുഖ്യപ്രശ്നം.
