ലോകകപ്പിന് മുന്‍പ് മൂന്ന് തവണ ഇന്ത്യയും പാകിസ്ഥാനും തമ്മില്‍ ഏറ്റുമുട്ടാന്‍ സാധ്യതയുള്ള ടൂര്‍ണമെന്റ് എന്ന നിലയില്‍ ഏഷ്യാകപ്പിനെ വലിയ കാത്തിരിപ്പോടെയാണ് ക്രിക്കറ്റ് ആരാധകര്‍ സ്വീകരിച്ചത്. എന്നാല്‍ ടൂര്‍ണമെന്റില്‍ ഇരുടീമുകളും തമ്മില്‍ ഏറ്റുമുട്ടിയ ആദ്യമത്സരവും സൂപ്പര്‍ ഫോറിലെ മത്സരവും മഴ മുടക്കിയിരിക്കുകയാണ്. റിസര്‍വ് ദിനമായ ഇന്ന് മഴ വില്ലനായില്ലെങ്കില്‍ ഇരു ടീമുകളും തമ്മില്‍ മുഴുവന്‍ ഓവര്‍ മത്സരവും നടക്കും. ഇന്നലെ മഴ കളി മുടക്കുമ്പോള്‍ 24.1 ഓവറില്‍ 147 റണ്‍സ് എന്ന നിലയിലായിരുന്നു ഇന്ത്യ. 56 റണ്‍സെടുത്ത ഓപ്പണര്‍ രോഹിത് ശര്‍മയുടെയും 58 റണ്‍സെടുത്ത ശുഭ്മാന്‍ ഗില്ലിന്റെയും വിക്കറ്റുകളാണ് ഇന്ത്യയ്ക്ക് നഷ്ടമായത്.