തെന്നിന്ത്യൻ സിനിമാലോകം ഏറെ ആഘോഷമായി കൊണ്ടാടിയ ഒന്നായിരുന്നു സാമന്ത-നാഗചൈതന്യ വിവാഹം. എന്നാൽ വിവാഹം കഴിഞ്ഞ് നാലുവർഷമാകു‌മ്പോൾ ഈ താരജോഡി വീണ്ടും വാർത്തകളിൽ നിറയുന്നത് തങ്ങളുടെ വിവാഹമോചന വാർത്തകളോടെയാണ്. കഴിഞ്ഞ ദിവസമാണ് അഭ്യൂഹങ്ങൾക്ക് വിരാമമിട്ട് തങ്ങൾ ഔദ്യോഗികമായി വിവാഹബന്ധം വേർപെടുത്താൻ പോകുന്നുവെന്ന് ഇരുവരും അറിയിച്ചത്. ഇപ്പോഴിതാ വിഷയത്തിൽ പ്രതികരണവുമായി എത്തിയിരിക്കുകയാണ് ബോളിവുഡ് സംവിധായകനായ രാം ഗോപാൽ വർമ.
വിവാഹമല്ല, വിവാഹമോചനമാണ് ആഘോഷിക്കപ്പെടേണ്ടതെന്നും വിവാഹം നരകത്തിലും വിവാഹമോചനം സ്വർഗത്തിലാണ് നടക്കുന്നതെന്നും സംവിധായകൻ ട്വീറ്റ് ചെയ്‌തു. വിവാഹം ബ്രിട്ടീഷ് ഭരണമാണ്, വിവാഹമോചനം സ്വാതന്ത്ര്യവും. വിവാഹം രോഗമാണ്, വിവാഹമോചനം രോഗശാന്തിയും. വിവാഹങ്ങളേക്കാൾ വിവാഹമോചനം ആഘോഷിക്കപ്പെടണം രാം ഗോപാൽ വർമ പറയുന്നു.
2017 ഒക്ടോബര് ആറിനാണ് നാഗചൈതന്യയും സാമന്തയും തമ്മില്‍ വിവാഹിതരായത്. ഇരുവരും തമ്മില്‍ അടുത്തകാലത്ത് സ്വരചേര്‍ച്ചയില്ലായിരുന്നുവെന്ന് റിപ്പോർട്ടുകൾ വന്നിരുന്നു. സാമൂഹ്യമാധ്യമങ്ങളിൽ തന്റെ പേരിൽ നിന്നും അക്കിനേനി എന്ന ഭാഗം സാമന്ത ഒഴിവാക്കിയതോടെയാണ് ഇരുവരുടെയും വിവാഹമോചന വാർത്തകൾ വീണ്ടും വാർത്തകളിൽ നിറഞ്ഞത്.