തമിഴ് സിനിമാലോകമാകെ ഞെട്ടിത്തരിച്ചിരിക്കുകയാണ്. സംവിധായകന്‍ ബാലയുടെ പുതിയ ചിത്രം ‘പരദേശി’യുടെ ട്രെയിലറാണ് വിവാദക്കൊടുങ്കാറ്റുയര്‍ത്തുന്നത്. സിനിമയിലെ അഭിനേതാക്കളെ സംവിധായകന്‍ മര്‍ദ്ദിക്കുകയും ചീത്തവിളിക്കുകയും ചെയ്യുന്ന രംഗങ്ങളാണ് പരദേശിയുടെ ‘റിയാലിറ്റി ടീസറി’ല്‍ ഉള്ളത്. എന്തായാലും ഈ രംഗങ്ങള്‍ കണ്ട് സിനിമാലോകത്തുള്ളവര്‍ തന്നെ ബാലയ്ക്കെതിരെ പ്രതിഷേധവുമായി രംഗത്തെത്തിക്കഴിഞ്ഞു.
സംവിധായകന്‍ ബാല താരങ്ങളെ അടിക്കുകയും ചവിട്ടുകയും വലിയ വടി ഉപയോഗിച്ച് ക്രൂരമായി തല്ലുകയും ചീത്തവിളിക്കുകയും ചെയ്യുന്ന രംഗങ്ങളാണ് ടീസറില്‍ ഉള്‍പ്പെടുത്തിയിരിക്കുന്നത്. ട്രെയിലറിനൊടുവില്‍ സംതൃപ്തിയോടെ ചിരിക്കുന്ന ബാലയുടെ ദൃശ്യങ്ങളും ഉള്‍പ്പെടുത്തിയിരിക്കുന്നതാണ് കൂടുതല്‍ ഞെട്ടല്‍ ഉളവാക്കുന്നത്. ഇത് സംവിധായകന്‍റെ സാഡിസ്റ്റിക് നിലപാടിന് ഉദാഹരണമാണെന്ന് ചൂണ്ടിക്കാട്ടി സിനിമാലോകത്തെ പ്രമുഖര്‍ രംഗത്തെത്തി.
സിനിമയ്ക്കെതിരെ പ്രതിഷേധമുയര്‍ത്തിയവര്‍ ഈ സിനിമ തങ്ങള്‍ ബഹിഷ്കരിക്കുമെന്ന് അറിയിച്ചു. “അഭിനേതാക്കളില്‍ നിന്ന് മികച്ച റിസള്‍ട്ട് കിട്ടാന്‍ അവരെ മര്‍ദ്ദിക്കുകയും ചീത്ത വിളിക്കുകയും വേണമെന്ന തെറ്റായ സന്ദേശം യുവസംവിധായകര്‍ക്ക് നല്‍കുന്ന ദൃശ്യങ്ങളാണ് ഈ ട്രെയിലറിലുള്ളത്. ഷൂട്ടിംഗ് സെറ്റുകളില്‍ മൃഗങ്ങളെ ഉപദ്രവിക്കാതിരിക്കാന്‍ എല്ലാവരും ശ്രദ്ധിക്കാറുണ്ട്. എന്നാല്‍ മനുഷ്യാവകാശം സംരക്ഷിക്കേണ്ടതും സംവിധായകരുടെ കടമയല്ലേ? എനിക്കും ഷൂട്ടിംഗിനിടെ ദേഷ്യം വരികയും മൊബൈല്‍ എറിഞ്ഞുപൊട്ടിക്കുകയുമൊക്കെ ചെയ്യാറുണ്ട്. എന്നാല്‍ എന്‍റെ ദേഷ്യം അഭിനേതാക്കളോടും സാങ്കേതികവിദഗ്ധരോടും പ്രകടിപ്പിക്കാതിരിക്കാന്‍ ഞാന്‍ ശ്രദ്ധിക്കും” - സംവിധായകന്‍ അറിവഴകന്‍ വ്യക്തമാക്കി.
“നാന്‍ കടവുള്‍ എന്ന സിനിമയുടെ ചിത്രീകരണത്തിനിടയില്‍ വികലാംഗരായ അഭിനേതാക്കളോട് എത്രമാത്രം ക്ഷമയോടെയും സഹാനുഭൂതിയോടെയുമാണ് ബാലാ സാര്‍ പെരുമാറിയതെന്ന് ഞാന്‍ പറഞ്ഞുകേട്ടിട്ടുണ്ട്. എന്നാല്‍ പരദേശിയുടെ ട്രെയിലര്‍ യുവസംവിധായകര്‍ക്ക് തെറ്റായ സന്ദേശം നല്‍കുന്നതാണ്. എന്തുകൊണ്ടെന്നാല്‍, തമിഴ് സിനിമയില്‍ അത്രമാത്രം സ്വാധീനം ചെലുത്തിയ സംവിധായകനാണ് ബാല. ഞാന്‍ ഒരു സംവിധായകനായതിന്‍റെ കാരണം തന്നെ അദ്ദേഹത്തിന്‍റെ സിനിമകളാണ്” - യുവസംവിധായകന്‍ ബാലാജി മോഹന്‍ പറയുന്നു.
എന്നാല്‍ ബാല താരങ്ങളെ മര്‍ദ്ദിക്കുന്നതല്ലെന്നും രംഗങ്ങള്‍ അഭിനയിച്ചുകാണിക്കുന്നതിന്‍റെ ദൃശ്യങ്ങളാണവയെന്നുമാണ് ചിത്രത്തിന്‍റെ അണിയറപ്രവര്‍ത്തകരുടെ വിശദീകരണം. താരങ്ങളെ തല്ലാനുപയോഗിക്കുന്ന വടി യഥാര്‍ത്ഥ വടിയല്ലെന്നും അവര്‍ പറയുന്നു.
എന്തായാലും സിനിമയുടെ പ്രമോഷനായി പുറത്തുവിട്ടിരിക്കുന്ന റിയാലിറ്റി ടീസര്‍ സിനിമയ്ക്ക് ദോഷമായി മാറുമെന്ന സ്ഥിതിയാണ് നിലവിലുള്ളത്. പോള്‍ ഹാരിസ് ഡാനിയലിന്‍റെ ‘റെഡ് ടീ’ എന്ന നോവലിന്‍റെ തമിഴ് പരിഭാഷയായ ‘എരിയും പനിക്കാട്’ ആധാരമാക്കിയാണ് ബാല ‘പരദേശി’ എടുത്തിരിക്കുന്നത്. സ്വാതന്ത്ര്യം ലഭിക്കുന്നതിന് മുമ്പ് ഒരു തേയിലത്തോട്ടത്തിലെ തൊഴിലാളികള്‍ക്ക് അനുഭവിക്കേണ്ടിവരുന്ന അടിമജീവിതത്തേക്കുറിച്ചാണ് സിനിമ പറയുന്നത്. അഥര്‍വ മുരളിയാണ് ചിത്രത്തിലെ നായകന്‍.
സേതു, നന്ദ, പിതാമഹന്‍, നാന്‍ കടവുള്‍, അവന്‍ ഇവന്‍ എന്നിവയാണ് ബാല സംവിധാനം ചെയ്ത ചിത്രങ്ങള്‍.